Швед бол Хойд Европ дахь манай тэргүүлэх түнш
Монгол Улсын Ерөнхийлөгч Ц.Элбэгдоржид тус улсад суух Онц бөгөөд Бүрэн эрхт элчин сайд Ларс Петер Фреден итгэмжлэх жуух бичгээ өнөөдөр өргөн барив.
Ерөнхийлөгч Ц.Элбэгдорж түүнийг итгэмжлэх жуух бичгээ өргөн барьсантай нь холбогдуулан хүлээн авч уулзлаа. Ерөнхийлөгч Шведийг Хойд Европ дахь манай тэргүүлэх түнш бөгөөд хоёр орон уламжлалт найрсаг харилцаатай гэдгийг дурдаад Монгол Улс элчин сайдын яамаа Стокгольмд нээсэн нь цаашдын харилцаа, хамтын ажиллагаанд чухал үүрэгтэйг тэмдэглэсэн юм. Мөн Монгол Улс Шведийн хөрөнгө оруулалт, технологи, ноу- хауд ач холбогдол өгч буйгаас гадна уул уурхай, боловсрол зэрэг салбарт хамтын ажиллагаагаа хөгжүүлэх сонирхолтойг илэрхийллээ.
Элчин сайд хамтын ажиллагааг хөгжүүлэхэд анхаарахаа дурдаад Монгол Улс Афганистанд энхийг сахиулахад тусалж байгаад болон цаазаар авах ялыг халах санаачилга гаргасантай холбогдуулан Ерөнхийлөгчид баяр хүргэв.
Элчин сайд Ларс Петер Фреден 1951 онд төрж, АНУ-ын Брандейсийн их сургуулийг түүхийн мэргэжлээр, Шведийн их сургуулийг орос, хятад судлалаар тус тус дүүргэжээ. Тэрээр Парист төвтэй Европын сансар судлалын агентлагийн Олон улсын харилцааны газрын дарга, Хорват, Македон, Косово, Албани улсад Шведийн Элчин сайдаар ажиллаж байжээ. Одоо БНХАУ-д суугаа Шведийн элчин сайдаар ажиллаж байгаа туршлагатай дипломатч юм.
Мoнгол Улс, Шведийн Вант Улсын хооронд 1964 онд дипломат харилцаа тогтоожээ. Манай улс Элчин сайдын яамаа 2009 оны 12 дугаар сарын 2-нд нээж, үйл ажиллагаагаа явуулж эхлэсэн байна.
Швед бол Хойд Европ дахь манай тэргүүлэх түнш
