Монгол Улсын Ерөнхийлөгч Цахиагийн Элбэгдорж өнөөдөр буюу 23-ны баасан гаригт Филадельфи хотын Симфони найрал хөгжмийн чуулгад зочиллоо. Энэ үеэр Филадельфи хотын Симфони найрал хөгжмийн чуулгын Ерөнхийлөгч Алиссон Вулгамор Монгол Улсын Ерөнхийлөгчид бараалхав.
Филадельфи хотын Симфони найрал хөгжмийн чуулгын Ерөнхийлөгч Алиссон Вулгамор “Бидний урилгыг хүлээн авсан Монгол Улсын Ерөнхийлөгчид гүн талархал илэрхийлье. НҮБ-ын Ерөнхий Ассамблейн чуулганд оролцоод зав гарган манай хотод хүрэлцэн ирж байгаа нь бидний хувьд нэр төрийн хэрэг юм. Энэ нь гадаадын улс орны төрийн тэргүүн бидний урилгыг хүлээн авсан анхны тохиолдол боллоо. Энэ нь хоёр орны соёлын салбарын харилцааг хөгжүүлэхэд томоохон түлхэц болно гэдэгт итгэлтэй байна. Ингээд АНУ-ын түүхэн хотуудын нэг болох Филадельфид тавтай морилж, манай чуулгын тоглолтыг тухлан үзнэ үү” хэмээв.
Монгол Улсын Ерөнхийлөгч хариу хэлэхдээ “Монголын ард түмэн дуу хөгжимд хайртай, эртний уламжлалт соёл, ёс заншилтай. Хөгжим бол хүн төрөлхтний хэл. Иймээс та бидний хамтын ажиллагаа өргөн хүрээнд хөгжинө гэдэгт итгэлтэй байна. Филадельфи хотын Симфони найрал хөгжмийн чуулга Ази дахь аялан тоглолтынхоо хүрээнд ирэх оны зургадугаар сард Улаанбаатар хотноо зочлон ирэх гэж байгааг дуулаад сэтгэл өндөр байна. Монголчууд ямар хөгжимлөг, соёл урлагт хайртай, зочломтгой ард түмэн болохыг та бүхэн мэдрэх болно.
Нэгэн цагт монголчууд асар уудам газар нутгийг нэгтгэсэн агуу гүрнийг байгуулж байсан. Монголын урлаг соёл, уламжлалт хөгжим бол бидний агуу түүхийн салшгүй хэсэг гэж үздэг. Америкчууд болон Филадельфи хот симфони найрал хөгжмөөрөө дэлхийд алдартайн адил монголчууд бид үндэсний хөгжим, морин хуурын чуулгаараа бахархдаг. Ирэх оны зургадугаар сард болох тоглолт нь та бүхний энэ гайхалтай хөгжим болон Монголын уламжлалт соёлыг нэгтгэн харуулсан үнэхээр гайхамшигтай арга хэмжээ болно гэдэгт итгэлтэй байна” хэмээв.
Уулзалтын дараа Монгол Улсын Ерөнхийлөгч Филадельфи хотын Симфони найрал хөгжмийн чуулгын тоглолтыг үзэж сонирхлоо.
Филадельфи хотын Симфони найрал хөгжмийн чуулга нь Ази дахь аялан тоглолтынхоо хүрээнд ирэх оны зургадугаар сард Улаанбаатар хотноо бүрэн хэмжээний тоглолт хийхийн зэрэгцээ хоёр орны урлаг соёлын салбарын харилцааг хөгжүүлэх олон арга хэмжээг зохион байгуулахаар төлөвлөөд байна. Дэлхийд нэрт удирдаач Янник Нэзэт-Сэгуйн тэргүүтэй чуулга нь Улаанбаатараас гадна БНХАУ болон БНСУ-аар аялан тоглолт хийх юм.
