Монгол Улсын Ерөнхийлөгч Цахиагийн Элбэгдорж Филадельфи хотын Симфони найрал хөгжмийн чуулгын тоглолтыг үзэж сонирхсоныхоо дараа Пенсилванийн их сургуульд зочлов.
Пенсильванийн их сургуулийн Нийгэм, шинжлэх ухааны факультетийн Декан, доктор Стивен Флуарти, “Perry World House”-ын дарга, доктор Виллиам Берк-Уайт, доктор Эйми Гадстен тэргүүтэй төлөөлөгчид Монгол Улсын Ерөнхийлөгчид бараалхлаа.
Уулзалтын үеэр Пенсильванийн их сургуулийн Нийгэм, шинжлэх ухааны факультетийн Декан, доктор Стивен Флуарти хэлсэн үгэндээ ”Цаг зав гарган манай сургуульд зочлон ирсэн та бүхэнд талархаж байна. Манай сургууль Монгол Улстай дотно харилцаатай байсаар ирсэн бөгөөд манай багш оюутнууд Пенсильванийн их сургууль дахь Монгол судлалын төвөөр дамжуулан их зүйлийг сурч мэддэг. Бид ч АНУ, Монгол Улсын иргэд, оюутнуудын хооронд гүүр болон ажиллаж байгаадаа бахархалтай байдаг. Ингээд та бүхэн манай сургуульд тавтай морилон саатахыг хүсэн ерөөе” хэмээв.
“Perry World House”-ын дарга, доктор Виллиам Берк-Уайт хэлэхдээ “Монголын ардчилал, хүний эрхийг хөгжүүлэх тал дээр гарамгай амжилт гаргаж байгаа Монгол Улсын Ерөнхийлөгч та манай сургуульд хүрэлцэн ирж, үгээ хэлэх гэж байгаад бид баяртай байна. Хэвлэлийн эрх чөлөө, шүүх засаглалыг сайжруулах, эдийн засгийн хөгжлийг дэмжих салбарт таны хийж буй ажил үйлс бол бидний зорилготой нэг юм. Та бүхэн манай сургуульд айлчлан ирсэн гадаадын улс орны төр засгийн анхны тэргүүн боллоо. Таны энэхүү айлчлал нь Монгол Улс болон Пенсильванийн их сургууль, “Perry World House” байгууллага хоорондын удаан жилийн хамтын ажиллагааны эхлэл болох болтугай” хэмээв.
Монгол Улсын Ерөнхийлөгч хариу хэлсэн үгэндээ “Бид бүхнийг халуун дотноор угтан авсанд гүнээ талархаж байна. Бид нэр зорилгтой, нэгдмэл үнэт зүйлтэй улс. Монгол Улс ардчиллын хүнд бэрх замыг сонгоод 20 гаруй жил боллоо. Энэ хугацаанд тулгарсан сорилж бэрхшээлийнхээ талаар туршлага солилцохоор Пенсильванийн их сургуульд ирсэн. Бид бусдад зааж сургахыг хүссэнгүй. Харин найз нөхөддөө сурсан мэдсэн зүйлээ хуваалцаж, туулсан замынхаа алдаа оноог ярилцан саналаа солилцохоор ирээд байна” хэмээв.
