Монгол Улсын Ерөнхийлөгчийн дэргэдэх Санхүү, эдийн засгийн салбар зөвлөл тав хоног хуралдана
Монгол Улсын Ерөнхийлөгчийн дэргэд байгуулагдсан Санхүү, эдийн засгийн салбар зөвлөлөөс хэд хэдэн чухал сэдвээр 2010 оны 10 дугаар сарын 28, 29, 30, 11 дүгээр сарын 2, 3-нд хуралдаан зохион байгуулна. Хуралдаан Ерөнхийлөгчийн Тамгын газрын дэргэдэх Иргэний танхимд болно.
Энэ сарын 28-нд Эдийн засгийн өсөлт, бодит секторын бодлогын дэд зөвлөл хуралдаж, Үндэсний хөгжил, шинэтгэлийн хорооны хөгжлийн бодлого, стратеги төлөвлөлтийн газрын дарга Г.Батхүрэл “Монгол Улсын 2011 оны макро эдийн засгийн чиг хандлага”, Ерөнхий сайд асан Д.Бямбасүрэн “Салбар хоорондын уялдаа”, Үндэсний статистикийн хорооны макро эдийн засаг, статистикийн газрын дарга Б.Бадамцэцэг “Салбар хоорондын баланс судалгааны тайлан, мэдээлэл” гэсэн сэдвүүдээр илтгэл тавьж, тус бүрээр нь чөлөөт ярилцлага өрнүүлнэ. Хуралдааныг Эрүүл мэндийн сайдын зөвлөх Д.Чимиддагва даргална.
29-нд Макро эдийн засгийн уялдаа холбоог сайжруулах дэд зөвлөл хуралдаж, ОУВС-гийн Монгол дахь суурин төлөөлөгч Пармешвар Рамлоган “Stand by хөтөлбөрийн хэрэгжилт, үр дүн, цаашдын сургамж”, УИХ-ын гишүүн Ч.Улаан “Монгол Улсын хөрөнгө оруулалтын бодлого, түүний үр ашиг”, Төрийн өмчийн хорооны ажилтан С.Бэхбат “Төр, хувийн хэвшлийн түншлэл”, Сангийн яамны төсвийн бодлогын газрын хөрөнгө оруулалтын хэлтсийн дарга М.Батгэрэл, Үндэсний хөгжил, шинэтгэлийн хорооны салбарын хөгжил, хөрөнгө оруулалтын нэгдсэн бодлогын газрын дарга Б.Ганбаатар, Төрийн өмчийн хорооны төр, хувийн хэвшлийн түншлэл, концессийн газрын дарга Б.Заяабал нар “Хөрөнгө оруулалтын хууль, эрх зүйн орчин, тогтолцоог боловсронгуй болгох нь” сэдвээр илтгэл тавьж, чөлөөт ярилцлага өрнүүлнэ. Хуралдааныг Сангийн дэд сайд Т.Очирхүү даргална.
30-нд Төсвийн бодлогын дэд зөвлөл хуралдаж, Сангийн яамны төсвийн бодлогын газрын дарга Б.Батжаргал “УИХ-д өргөн барьсан Монгол Улсын төсвийн 2011 оны төсөл, 2012-2013 оны төсөөлөл, цаашдын чиг хандлага”, УИХ-ын даргын зөвлөх Д.Даваасамбуу “АНУ-ын парламент төсвийг хэрхэн хэлэлцдэг талаарх туршлага”, Монгол Улсын Ерөнхийлөгчийн зөвлөх Л.Дашдорж, Татварын ерөнхий газар, Сангийн яамны хүмүүс “НӨАТ-ын тухай” илтгэл тавьж, чөлөөт ярилцлага өрнүүлнэ. Хуралдааныг Ерөнхий сайдын зөвлөх Н.Энхбаяр даргална.
11 дүгээр сарын 2-нд Мөнгөний бодлогын дэд зөвлөл хуралдаж, Монгол банкны мөнгөний бодлого судалгааны газрын захирал Д.Болдбаатар “УИХ-д өргөн барьсан 2011 оны Мөнгөний бодлогын төсөл, 2012-2013 оны таамаглал, цаашдын чиг хандлага”, Үндэсний хөгжил, шинэтгэлийн хорооны дарга Ч.Хашчулуун “Монгол Улсын Хөгжлийн банкны талаар” илтгэл тавьж, чөлөөт ярилцлага өрнүүлнэ. Хуралдааныг УИХ-ын гишүүн Р.Амаржаргал даргална.
3-нд Төлбөрийн тэнцэл, валютын бодлогын дэд зөвлөл хуралдаж, Монгол банкны валют, эдийн засгийн газрын захирал Г.Дэлгэрмаа “Монгол Улсын төлбөрийн тэнцлийн 2011 оны хандлага, 2012-2013 оны төсөөлөл, цаашдын чиг хандлага”, Сангийн яамны санхүү, эдийн засгийн бодлогын газрын дарга Б.Батбаяр “Азийн бондын зах зээл, түүний дотор Самурай бонд” гэсэн илтгэл тавьж, чөлөөт ярилцлага өрнүүлнэ. Энэ өдрийн хуралдааныг МУИС-ийн Эдийн засгийн сургуулийн захирал Ц.Даваадорж даргална.
Бүх өдрийн хуралдаан өглөө 9 цаг 30 минутаас эхэлж, 13 цагт өндөрлөнө.
Монгол Улсын Ерөнхийлөгчийн дэргэдэх Санхүү, эдийн засгийн салбар зөвлөл тав хоног хуралдана
