Өнөөдөр Олон Улсын Валютын Сангийн Монгол дахь Суурин төлөөлөгчийн газрын шинэ болон хуучин удирдлагууд Монгол улсын Ерөнхийлөгч Ц.Элбэгдоржид бараалхав.
Бараалхах үеэрээ ОУВС-ийн Суурин төлөөлөгчөөр ажиллаж байсан ноён Бёнг Кюн Жанг шинээр томилогдон өөрийх нь албыг уламжлан авч байгаа ноён Пармешвар Рамлоганыг Ерөнхийлөгчид танилцууллаа. Ноён Пармешвар Рамлоган нь маргаашнаас ОУВС-ийн Монгол дахь Суурин төлөөлөгчөөр ажиллаж эхлэх юм байна.
Уулзалтын эхэнд Ерөнхийлөгч Ц.Элбэгдорж хэлэхдээ,
- Би та бүхний хийж байгаа ажил болон Монгол улсад оруулж байгаа хувь нэмэрт тун их талархаж байдгаа илэрхийлье.
Та бүхэн манай улсын Засгийн газар, Ерөнхий сайдтай ойр нягт хамтран ажиллаж байгаад баяртай байна гээд, санхүү эдийн засгийн хямралтай энэ цаг үед банкны салбар болон төсвийн зарлагын шинэтгэлийн асуудалд онцгой анхаарал тавьж үйл ажиллагааны шинэ стратеги барьж ажиллахыг зөвлөв.
Мөн төсвийн хууль,эрх зүйн орчинг улам боловсронгуй болгох, орон нутгийн төсвийн харилцааг шинэ шатанд гаргах ажлыг эхлүүлэх шаардлагатай байна гэж тэмдэглэв.
Ноён Бёнг Кюн Жанг хариу хэлэхдээ
- Одоогийн хамтын ажиллагааны нөхцөл байдал өмнөх цаг үеэс ялгаатай, санхүүгийн хямралтай хүнд бэрх цаг үед үргэлжлэх нь гэдгийг бид ойлгож байгаа. Монгол улсын банкны системд итгэх итгэлийг нэмэгдүүлэхэд бид ихээхэн анхаарал тавьж ажиллах болно. Энэ нь ач холбогдлын хувьд Оюутолгойн төслөөс дутахгүй, магадгүй илүү ч байж болох юм гэдгийг анхаарах хэрэгтэй байна.
Төсвийн шинэтгэлийн хууль,эрх зүйн орчныг бүрдүүлэхэд та бүхэнтэй нягт хамтран ажиллах болно. Монголын талтай илүү ойр дотно хамтран ажиллах бололцоо олдож байгаад баяртай байна гэж тэмдэглэлээ.
Ерөнхийлөгч Ц.Элбэгдорж хоёр талын хамтын ажиллагаанд илүү нягт харилцаа чухал гэдэгтэй санал нэг байгаагаа илэрхийлээд “ Та бүхний баялаг туршлага манай оронд сайн сайхан цагийн авчирна гэж бодож байна” гэж хэллээ.
Уулзалт харилцан ойлголцсон , халуун дотно уур амьсгалд болж өндөрлөлөө.
