Шүлхийтэй тэмцэхэд бодит хамтын ажиллагаа чухал байна
Монгол Улсын Ерөнхийлөгч Ц.Элбэгдорж Олон улсын цөмийн эрчим хүчний агентлаг/ОУЦЭА/-ийн Ерөнхий захирал Юкия Аманог өнөөдөр хүлээн авч уулзлаа.
“Дэлхий дахины энх тайван, эрүүл мэнд, хөгжил цэцэглэлд цөмийн эрчим хүчний оруулах хувь нэмрийг нэмэгдүүлэх гэсэн ОУЦЭА –ийн зорилтыг Монгол Улс бүрэн дэмждэг. 2009 оны 12 дугаар сард хөтөлбөрт гарын үсэг зурсан нь Монгол Улс, ОУЦЭА хоорондын хамтын ажиллагааг нэмэгдүүлэхэд чухал алхам болсон” гээд Ерөнхийлөгч Эрчим хүч, эрүүл мэндийн салбарт цөмийн энергийг ашиглахтай холбоотойгоор мэргэжилтэн сургах, чадавхийг нь сайжруулах шаардлагатай байгааг дурдав.
Ноён Юкия Амано цөмийн технологийн тусламжтайгаар шүлхий өвчний нянгийн идэвхийг саармагжуулах, оношлоход ахиц гарч байгааг мэдэгдлээ. Үүнтэй холбогдуулан Ерөнхийлөгч хэлэхдээ “Өнөөдөр монголд, шүлхий өвчний тархалт жирийн малчнаас өгсүүлээд төрийн тэргүүний санааг зовоож байна” гээд яаралтай, бодитой, үр дүнтэй хамтын ажиллагаа эхлүүлэхийг санал болголоо.
Юкия Амано Монгол Улс, ОУЦЭА-гийн яриа хэлэлцээ амжилттай үргэлжилж байгаа болон цөмийн мэргэжилтнүүдийг сургах, хорт хавдрын эсрэг тэмцэх, ХАА-н салбарт цөмийн технологи ашиглах боломж бий гэдгийг мэдэгдэв.
Шүлхийтэй тэмцэхэд бодит хамтын ажиллагаа чухал байна
