Хатагтай, ноёд оо,
Дэлхийн Эрүүл мэндийн байгууллагаас манай орныг уур амьсгалын өөрчлөлт-эрүүл мэндийн судалгаа, хамтын ажиллагааны чиглэлээр Номхон далайн баруун бүсийн хэмжээнд сонгон хамруулж, үндэсний стратегийг боловсруулахад дэмжлэг туслалцаа үзүүлж байгаад Монгол Улсын Ерөнхийлөгч би чин сэтгэлийн талархал илэрхийлэхийн ялдамд симпозиумын үйл ажиллагаанд амжилт хүсч байна.
Дэлхийн уур амьсгалын өөрчлөлт нь манай гарагийн экосистем, хүн төрөлхтний оршихуйд хүчтэй илэрч, үр дагавар нь нийгэм, эрүүл мэндэд сөргөөр нөлөөлж, улс орнуудын хэмжээнд хоол хүнсний хомсдол, өвчин эмгэг, эндэгдлийг нэмэгдүүлэх, гамшигт үзэгдлийн давтамж, тархалтын орон зай, хил хязгаар мэдэгдэхүйц өөрчлөгдөж буй нь улс орон бүрийг тогтвортой хөгжил, байгаль орчиндоо чиглэсэн бодлого, үйл ажиллагаагаа харилцан уялдуулж алсын хараатай авч хэрэгжүүлэхийг шаардаж байна.
Монгол Улс экологийн хувьд эмзэг орон. Уур амьсгалын өөрчлөлтийн нөлөөлөл, түүний сөрөг үр дагаврын талаар хийсэн судалгаагаар дэлхийн дулаарал нь манай орны байгалийн бүсүүд, усны нөөц, мөнх цас, цэвдэгшилд ихээхэн сөрөг нөлөө үзүүлэх нь нотлогджээ.
Өргөн уудам нутаг дэвсгэртэй, дэд бүтэц харьцангуй сул хөгжсөн манай орны хувьд хүн амын эрүүл мэндийн талаар авч хэрэгжүүлэх арга хэмжээгээ уур амьсгалын өөрчлөлттэй тэмцэх, сэргийлэх үйл ажиллагаатай уялдуулан боловсронгуй болгох, шаардлагатай нөөц, үндэсний чадамжийг бүрдүүлэх нь чухал байгааг давтамж нь нэмэгдсээр буй байгалийн гамшигт үзэгдлүүд харуулсаар байна.
Уур амьсгалын өөрчлөлтөөс хүн амын эрүүл мэнд, эрүүл мэндийн тогтолцоонд үзүүлж буй нөлөөллийг илрүүлэх, урьдчилан сэргийлэх, дасан зохицох механизмыг боловсронгуй болгох нь дан ганц эрүүл мэндийн салбарын асуудал бус Засгийн газар, төрийн болон төрийн бус байгууллага төдийгүй олон улсын хамтын нийгэмлэгийн туслалцаа дэмжлэг шаардлагатай тулгамдсан асуудал мөн. Асуудал нь даяаршсан шинж чанартай тул шийдэл нь ч тийм байх ёстой.
Монгол Улс уур амьсгалын өөрчлөлтийн НҮБ-ын суурь конвенц болон Киотогийн протоколыг хэрэгжүүлэхийн төлөө цаашид ч их зүйл хийх шаардлагатай байна. Уур амьсгалын өөрчлөлтийн эрчийг сааруулах, багасгахад чиглэсэн олон улсын байгууллага, Засгийн газар хоорондын үйл ажиллагааг нягт уялдуулах, эрдэм шинжилгээ, судалгааны ажлыг эрчимжүүлэх, бүс нутгийн төвшинд шийдвэрлэх дээд хэмжээний уулзалт зохион байгуулахад манай улс идэвхитэй хамтран ажиллахын төлөө байна.
Уур амьсгалын өөрчлөлтийг багасгах, дасан зохицох, сөрөг нөлөөллөөс сэргийлэх, хүн амыг хамгаалах, түүнээс үүдэлтэй гарз хохирол, эндэгдлийг бууруулах талаар төрөөс баримтлах бодлогоо оновчтой тодорхойлох нь байгаль экологийн тэнцвэртэй орчинд тогтвортой хөгжихийн суурь болж чадна гэдэгт итгэлтэй байна.
Олны хүч оломгүй далай гэдэг. Байгаль орчны тогтвортой байдлыг хангах, хөгжлийн төлөө дэлхий нийтийн түншлэлийг хөгжүүлэхэд ч Та бүхний үүрэг зорилго их гэдгийг онцлон тэмдэглэе.
Та бүхэнд сайн сайхныг хүсье.
МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ
