Мөнгө, зээлийн бодлого үгүйлэгдэж байна.
Монгол Улсын Ерөнхийлөгчийн дэргэдэх Санхүү, эдийн засгийн салбар зөвлөлийн мөнгөний бодлогын дэд зөвлөл өнөөдөр иргэний танхимд хуралдаж, Монгол банкны мөнгөний бодлого судалгааны газрын захирал Д.Болдбаатар “УИХ-д өргөн барьсан 2011 оны мөнгөний бодлогын төсөл, 2012-13 оны таамаглал, цаашдын чиг хандлага” гэсэн илтгэл тавьж, Үндэсний хөгжил шинэтгэлийн хорооны дарга Ч.Хашчулуун “Хөгжлийн банкны талаар мэдээлэл хийж, чөлөөт ярилцлага өрнүүлэв.
Мөнгөний бодлого эдийн засгийн дунд хугацааны тогтвортой өндөр өсөлтийг хангахад чиглэж байгаа. 10 хувиас доош инфляцитай байхад эдийн засгийн өсөлтийн боломжийг ашиглаж чадна. Хэрэглээний чанарын өсөлтөд анхаарсан. Иймээс инфляци 9-10 хувьд дөхүү байх ёстой. Валютын ханшийг тогтвортой барина гэдэг тийм ч боломжтой зүйл биш. Хятад, Япон ийм оролдлого хийж байна. Капиталын урсгал ямар хэлбэртэй байхаас шалтгаалаад үндэсний валютын ханш чангарч, сулардаг. Төгрөгийн ханш чангарах, цалин өсөх нь нэг муу талтай. Үйлдвэрлэлийн зардлын дарамтад оруулдаг. Уул уурхайгаас эдийн засаг хэтэрхий хамааралтай, экспортын нэр төрөл цөөн, санхүүгийн зуучлагчийн ажиллагаа төдийлөн оновчтой биш зэрэг нь мөнгөний бодлого, ханшид ихээхэн нөлөөтэй байна. Манай банкууд эдийн засгийн өнөөгийн шаардлагад нийцэж ажиллахад бэлэн биш байна. Том том төсөл банкнаас бусад хэлбэрийн санхүүжилт авах боломж алга. Ер нь өнөөдөр зээл олгох эрх зүйн орчин бүрдээгүй байна. Монгол банк ил тод, хариуцлагатай, таамаглахуйц, үйлдэл тодорхой байхад үйл ажиллагаагаа чиглүүлдэг. Зээлийн хүүг бууруулахын тулд томоохон хөтөлбөр хэрэгжүүлэх хэрэгтэй хэмээн илтгэгч ярилаа.
Оролцогчид Монгол банкны үйл ажиллагаа явцуу байна гэж шүүмжлэв. Зүй нь Монгол банкны үйл ажиллагаа эдийн засаг, нийгмийн бодлого, хөтөлбөр, тэтгэвэр тэтгэмж, хөрөнгийн биржтэй холбогдож, арилжааны банкны зээлийн хүүг бууруулахаар өргөн хүрээнд байх ёстой ажээ.
Өнөөдөр банкууд урт хугацааны зээл олгож чадахгүй байна. Зөвхөн арилжааны зээл олгож байна. Хөрөнгө оруулалтын зээл алга. Энэ нь арилжааны зээл илүү ашигтай байдагтай ч холбоотой болов уу. Арилжааны банкууд тогтвортой хөрөнгийн эх үүсвэртэй болох хэрэгтэй. Гадаадын том банкны салбаруудыг оруулж ирж, хөрөнгө оруулалтын зээл өгч болох ч энэ нь үндэсний аюулгүй байдалд нийцэхгүй. Эдийн засаг, нийгмийн бодлого шинээр боловсруулах хэрэгтэй. Гадаадын хөрөнгө оруулалт их орж ирэх учир үүнд одооноос бэлдэж, хөтөлбөр хэрэгжүүлэх нь зүйтэй. Манай хөтөлбөрүүд хоорондоо уялдаагүй байна. Хоёр шатлалтай банк монголд нийцэхгүй. Монгол банкийг Засгийн газарт өгмөөр юм. Мөнгөний бодлогыг мөнгө, зээлийн бодлого болгууштай. Зээл, инфляци хоёрын хооронд маш том ангал байна. Жижиг эдийн засагт зах зээл мөнгөний ханшийг зохицуулж чадахгүй. Монгол банкны гол үүрэг зээлийн хүүг бууруулах явдал гэхчлэн хүмүүс ярив.
Өнөөгийн арилжааны банкууд өндөр хүүтэй, жижиг, богино хугацаатай зээл олгож байна. Нийт зээлийн 99.4 хувь нь 50 саяаас доош байна. 200-500 сая төгрөгийн зээл дөнгөж, 0.1 хувьтай тэнцэж байна. Арилжааны банкны хүү өнгөрсөн оны байдлаар 23 хувиас давсан. Гэтэл өндөр технологид суурилсан аж үйлдвэр хөгжүүлэх, экспортын шинэ салбаруудыг дэмжин эдийн засгийг оновчтой төрөлжүүлэхэд ихээхэн хөрөнгө хэрэгтэй. Дэд бүтэц бас их хөрөнгө шаарддаг.
Иймээс Хөгжлийн банк байгуулж, гадаадын хөрөнгө оруулагчидтай эрсдэлээ хуваалцаж харилцан ашигтай хамтран ажиллахад хүрлээ. Хөрөнгө оруулалтын банк Хятад, Япон гээд бусад оронд ч бий. Япон гэхэд л дэлхийн хоёрдугаар дайнд сүйдсэн эдийн засгаа сэргээхээр 1951 хөгжлийн банк байгуулж байсан. Хөгжлийн банк байгуулснаар бусад банкны зах зээлийг булаах бус харин ч хамтран ажиллах шинэ салбаруудыг бий болгоно. Зээлийн хүүг бууруулах боломжийг ч бүрдүүлж болох талтай хэмээн Ч.Хашчулуун хэллээ.
Мөнгө, зээлийн бодлого үгүйлэгдэж байна.
