Монгол Улсын Ерөнхийлөгчийн мэндчилгээ Монголын Үйлдвэрчний Эвлэлийн Соёлын төв ордны 35 жилийн ойд
Монголын Үйлдвэрчний Эвлэлийн Соёлын төв ордны 35 жилийн ойд
Монголын Үйлдвэрчний Эвлэлийн Соёлын төв ордон бол ардчиллын түүхэнд нэрээ үлдээсэн өргөө билээ. Монголын ардчилсан холбоо анхдугаар их хурлаа энэ ордонд хийж ард түмэндээ үзэл бодол, үгээ хүргэсэн түүхтэй. Танай хамт олон уг хурлыг зохион байгуулахад багагүй хувь нэмэр оруулж түүгээрээ бахархаж явдгийг дурсан санахад таатай байна. Хүндтэй энэ өргөөний эзэн болсон танай хамт олонд баярын мэнд дэвшүүлье.
Хөдөлмөрчдийн эрх ашгийг хамгаалагч Үйлдвэрчний эвлэлээр овоглосон танай ордон байгуулагдсан цагаасаа иргэдийн оюуны болон соёлын эрэлт хэрэгцээнд нийцсэн төрөл бүрийн үйлчилгээг хүмүүст хүргэж, улсын болон олон улсын чанартай арга хэмжээнүүдийг нэр төртэй зохион байгуулж, хэрэглэгчдийн найдвартай түнш, нийслэлийн соёлын тэргүүний байгууллага болсон танай ажилсаг хамт олны хичээл зүтгэлийн үр дүн юм.
Энэхүү ордонд анх зохион байгуулж, өдгөө уламжлал болсон “Морин хуур” наадам, “Цагаан лавайн эгшиг” концерт, “Мэргэжлийн морин хуурчдын улсын уралдаан”, ажилчдын болон оюутны урлагийн их наадам өсвөр үеийнхний авьяасыг нээн илрүүлэх, мэргэжлийн уран бүтээлчдийн идэвх санаачилгыг дэмжин хөгжүүлэхэд үнэтэй хувь нэмэр оруулсан. Үүний зэрэгцээ Азийн энх тайвны бага хурал, Дэлхийн монголчуудын их хурал, Олон улсын монголч эрдэмтдийн их хурал, Азийн хөгжмийн долдугаар индэр симпозиум гээд олон олон томоохон арга хэмжээ зохион байгуулагдсан билээ. Та бүхэн энэ арвин туршлагадаа тулгуурлан монгол түмнийг гэгээрүүлэх, залуу үеээ хөгжүүлэх эрхэм үйлсдээ цаашид ч ихээхэн амжилт олно гэдэгт итгэж байна.
Сайн үйлс улам дэлгэрэх болтугай.
МОНГОЛ УЛСЫН ЕРӨНХИЙЛӨГЧ Ц.ЭЛБЭГДОРЖ
Улаанбаатар 2010 оны 11 дүгээр сарын 05-ны өдөр
Монгол Улсын Ерөнхийлөгчийн мэндчилгээ Монголын Үйлдвэрчний Эвлэлийн Соёлын төв ордны 35 жилийн ойд
