Үерийн дараа үүссэн нөхцөл байдалтай холбогдуулан МУ-ын Ерөнхийлөгч Ц.Элбэгдорж Улаанбаатар хотын Засаг даргын Тамгын газарт ажиллалаа.

Ерөнхийлөгч нөхцөл байдалтай цаг тухай бүрт нь танилцаж, хотын удирдлагуудтай биечлэн уулзаж байсан ч энэ удаад хот төлөвлөлтийн асуудлаар зөвлөлдөж, тодорхой чиг үүргүүдийг өгөх хэрэгтэй гэж үзсэн юм.

Нийслэлийн засаг дарга бөгөөд Улаанбаатар хотын захирагч Н.Мөнхбаяр 7-р сарын 11-24-ний өдрүүдэд орсон хүчтэй аадар борооны улмаас хотод үлэмж хэмжээний хохирол учирсан тухай уулзалтынхаа эхэнд танилцууллаа.

Хүмүүсийг нүүлгэн шилжүүлж, байрлуулж, хооллосон, мөн орон гэргүй болсон айлуудад гэр олгосон, суваг шуудууг цэвэрлэсэн гэхчилэн арга хэмжээнүүдийг цал алдалгүй авсан. Энэ бүхэнд зарцуулсан урсгал зардлыг Засгийн газрын нөөц хөрөнгөнөөс шийдээд байгаа.
Цаашдаа хотыг хөгжүүлэх хүрээнд, суурьшлын бүсийг шинээр тогтоож, үерийн далангуудыг мөн шинээр барин, одоо баригдсан байгаа зарим шинэ хорооллуудад үерийн далан хийх шаардлагатай гэдэг дүгнэлтийг мэргэжлийн байгууллагууд гаргажээ.

Ойролцоогоор 72 км далан , 12 км хөрсний ус зайлуулах шугам, 32 км гадаргуугийн ус зайлуулах шугам тус тус шинээр байгуулах хэрэгтэй гэдэг тооцоог мөн хийсэн байна. Энэ бүхний өртөг нь 54 тэрбум төгрөг болно гэж хотын дарга хэллээ.

Ерөнхийлөгч мэдээллийг сонссоны дараа зарим асуултанд хотын удирдлагуудаас хариулт авлаа. Тухайлбал, энэ үерийн дараа та бүхэн ямар дүгнэлт хийж байна вэ гэж асуухад, хотыг нэг гарт төвлөрүүлэх хэрэгтэй юм байна гэж Засаг дарга Н.Мөнхбаяр хариуллаа.
Барилга эхлүүлэх зөвшөөрлийг УМХГ өгдөг, Туул голоос урагшаа газруудад барилга барих зөвшөөрлийг БОАЖЯ өгдөг юм байна.

Хотын төлөвлөгөө гэж байгаа эсэх, энэ төлөвлөгөө нийтэд ил байх боломжтой эсэх, мөн хотод газар олголт хэр байгаа зэрэг асуултуудад Ерөнхийлөгч мөн хариулт авлаа.

Иргэдийн зүгээс хотын газар олголт, барилгын чанар, хот төлөвлөлттэй холбоотой маш олон гомдол санал ирдэг, олон барилгын чанарт өнөөдөр оршин суугчид эргэлзэж, сэтгэл эмзэглэж байгаа, тэд хэзээ энэ олон чанаргүй барилгуудаас нурж, хүний аминд хүрэх болоо гэсэн айдастай амьдардаг, “нар үзэх эрх” зөрчигдөж байгаа зэргийг Ерөнхийлөгч дурдаад, иргэндээ зориулж хот барья гэлээ.

Дараа нь тэрээр тодорхой асуудлуудаар чиг үүрэг өгсөн:

1. Нурсан эвдэрсэн хойно нь иргэд төрөөс биш гүйцэтгэгчээс юм уу, даатгалын компаниас нэхэмжлэл нэхдэг байхын тулд даатгалын системийг энэ салбарт нэвтрүүлэх нь чухал.
2. Зөвшөөрөл олгохгүй газруудыг нийтэд ил зарладаг байх зарчимыг нэвтрүүлэх нь зөв гэж үзэж байна.
3. Мэргэжлийн байгууллагууд болон иргэдийн төлөөллийн оролцоотой барилгын чанарын шалгалт ойрын үед явуулах чиглэл өглөө. Ер нь барилгын стандартыг чангатгаад, стандартад нийцээгүй барилга барьсан бол гүйцэтгэгчтэй хариуцлага тооцдог болох хэрэгтэй гэлээ. Ийм гурван чиглэлээр үүрэг өгсний дараа, хотын эрхзүйн байдлыг өөрчлөх цаг болсон гэж үзэж байгаагаа Ерөнхийлөгч Ц.Элбэгдорж мөн хэллээ.

Нэг сарын дараа Ерөнхийлөгч хотын удирдлагатай дахин уулзаж, энэ бүхний мөрөөр хийж байгаа ажлуудын талаар дахин ярилцахаар боллоо.