Монгол Улсын Ерөнхийлөгч Ц.Элбэгдорж байгалийн гамшигийн үед өргөсөн тангаргаа үнэнчээр биелүүлж олон хүний амь насыг аварсан эр зоригтнуудыг шагналаа.
Ерөнхийлөгч Онцгой байдлын албаны 6 албан хаагчийг “Цэргийн хүндэт медаль”-иар, 17 албан хаагч, 3 иргэнийг “Шударга журам медаль”-иар тус тус шагнах зарлигт гарын үсэг зурсан юм. / Зарлиг дугаар № 58/
Бусдын төлөө амь насаа үл хайхран, үхэлтэй тэмцсэн эрэлхэг аврагчид болон иргэний үүргээ нэр төртэй биелүүлсэн иргэдээр бахархаж байгаагаа Ерөнхийлөгч шагнал гардуулах үеэр хэллээ.
Шагнал хүртсэн ОБЕГ-ын аврагчид болон иргэд дараа нь үерийн үеийн нөхцөл байдлын талаар болон гүйцэтгэдэг ажил үүргийнхээ талаар Ерөнхийлөгчтэй илэн далангүй ярьсан. Тухайлбал, дээд түрүүч Г.Амарбаясгалан үерийн үед 1,60 метр гүн усанд живж байсан 20-35 насны 3 хүний амийг аварчээ. Шадар дэслэгч Б.Батбилэг үерийн үеэр 5 хүний амь нас эд хөрөнгийг авран хамгаалах ажиллагааг шуурхай зохион байгуулсан бол, Тэргүүн түрүүч Ж.Баяртогтох мөн усны аюулын нэгдүгээр зэрэглэлийн бүсээс 2 хүний амь аварч, 10 гэрийг нүүлгэн шилжүүлжээ.
Шагнал хүртсэн аврагчид болон иргэд тус бүр 2-9 хүний амийг үерийн үеэр аварсан байна.
Ерөнхийлөгч Ц.Элбэгдоржид ОБЕГ-ын дарга Ц.Амгаланбаяр байгууллагынхаа талаар товч мэдээлэл өгсөн. Өнөөдөр энэ газарт 3386 албан хаагч ажиллаж байгаагийн 60 гаруй хувь нь залуучууд юм байна.
