Ерөнхийлөгчийн гэр бүл хүн ам, орон сууцны тооллогод хамрагдлаа
Монгол орон даяар өнөөдөр хүн ам, орон сууцны 2010 оны улсын тооллого эхэлж байна. Өнөөдөр өглөө Монгол Улсын Ерөнхийлөгч Ц.Элбэгдорж гэр бүлийн хамт тоолууллаа. Тооллогыг нийслэлийн Хан-Уул дүүргийн тооллогын комиссын ажилтнууд Их тэнгэр дэх гэрт нь очиж авсан юм.
Ерөнхийлөгч энэ үеэр нийт ард иргэддээ хандаж, тооллогодоо идэвхитэй хамрагдахыг уриалав. Тэрээр хэлэхдээ “Монголчууд хүн амаа тоолж байсан түүхэн уламжлалтай. Тэртээ 13-р зуунд эзэн Чингисийн байгуулсан Төрт улс хүн ам, мал сүргээ тоолж дансалж байсан. Хүн болж төрснийх Төрдөө данстай, Түмэндээ нэртэй явах ёстой гэж манай ард түмэн ярьдаг. Энэ бол монголчууд төрдөө данслуулж, тоолуулж байхын чухлыг эртнээс сургадаг байсан гэсэн үг.
Өнөөдөр Монгол Улс даяар эхэлж байгаа хүн ам , орон сууцны тооллогодоо иргэн бүр хариуцлагатай, хүлээсэн үүргийнхээ дагуу идэвхитэй хамрагдахыг уриалж байна. Тоолуулж, төрдөө бүртгүүлнэ гэдэг бол иргэн Таны үүрэг юм” гэлээ.
Ерөнхийлөгч мөн хүн ам, орон сууцны тооллогыг зохион байгуулж байгаа комиссын гишүүд, тоологчдод хандан хариуцлагатай, амжилттай ажиллахыг хүсэв.
Улс орон бүр хүн амаа 10 жил тутам тоолж байх НҮБ-ын зөвлөмжийн дагуу манай улс 10 дахь удаагаа хүн амаа тоолж байна. Тооллого энэ сарын 11-17-ны хооронд явагдаж дуусах бөгөөд, 4 сарын дараа урьдчилсан дүн, ирэх оны 6-р сарын нэгэн гэхэд эцсийн тоо дүн гарах юм.
Ерөнхийлөгчийн гэр бүл хүн ам, орон сууцны тооллогод хамрагдлаа
