Ерөнхийлөгч Европын Холбооны Элчин сайдуудыг хүлээн авч уулзав
Монгол Улсын Ерөнхийлөгч Ц.Элбэгдорж Европын Холбооны гишүүн орнуудаас Манай улсад суугаа Элчин сайд нарыг өнөөдөр хүлээн авч уулзав. ХБНГУ-ын элчин сайд П.Фишер хүрэлцэн ирсэн дипломатуудыг танилцууллаа. Уулзалтад Англи, Болгар, Герман, Франц, Чех, Австри, Бельги, Испани, Кипр, Польш, Португал, Финланд, Унгар, Шведийн элчин сайд, элчин сайдыг түр хамаарагч нар, мөн Европын комиссын төлөөлөгчийн газрын дэд тэргүүн нар оролцсон юм.
Ерөнхийлөгч ярихдаа “Монгол Улс Европын холбооны орнуудтай тогтоосон харилцаагаа чухалд үздэг. Учир нь бид нийтлэг үнэт зүйлстэй. Өнгөрсөн 20 жилд бид хүний эрх, шударга ёс, хуулийг дээдэлж, хүндэтгэж ирсэн. Бид хүнээ хөгжүүлэх, хүндээ үйлчлэхийг хичээсэн. Манай орны ардчилсан хөгжлийн 20 жилийн ололт бол зөвхөн биднийх биш. Монгол орон хүний эрх, улс төр, эдийн засгийн либеральчлалын хувьд үлгэр жишээ улс. Ардчилал, зах зээлд шилжихэд Европын холбооны орнууд манай улсад тусалсан нь өнөөдрийн ололт амжилтад хүрэхэд том дэм болсон.
Үндсэн хуульд заагдсан гол зорилгыг удирдлага болгон цаазаар авах ялыг бүрмөсөн халах чиглэлээр бид ажиллаж байгаа. Мөн орон нутгийн төсвийн эрх мэдлийг нэмэгдүүлэх, иргэдийн шууд оролцоог хангах, хээл хахууль, авлигатай тэмцэх, эрх зүйн шинэчлэлийг хийж таатай орчин бүрдүүлэх чиглэлээр ажиллаж байна.
Монгол Улсын гадаад бодлогын тэргүүлэх чиглэл, урт хугацааны стратегийн зорилтуудын нэг нь Европын Холбоо болон түүний гишүүн орнуудтай харилцаа, хамтын ажиллагааг бололцоотой бүх салбарт эрчимжүүлэн хөгжүүлэх явдал юм. Үүнд Түншлэл, хамтын ажиллагааны хэлэлцээр байгуулах нь чухал үүрэг гүйцэтгэнэ гэдэгт итгэлтэй байна.
Монгол Улс халуун цэгүүдэд энхийг сахиулах үйл ажиллагаанд оролцож байгаагаараа бахархдаг" гэв.
Бельгийн элчин сайд хээл хахууль, авлигыг зогсоох ямар арга хэмжээг авч байгаа талаар сонирхоход Ерөнхийлөгч хуулийн үндсийг сайн болгох, ингэхдээ НҮБ-ын Авлигын эсрэг конвенцид нэгдэж, түүний заалтуудыг хуульдаа тусгаж өгөх бодолтойгоо ярилаа.
Норвегийн элчин сайд газрын тосны сан гэж байдаг, тийм сан байгуулах эсэхийг лавлахад Ерөнхийлөгч Хүний хөгжлийн сан байгуулсан, энэ нь ард түмний амьжиргааг дээшлүүлэх, хуримтлал бий болгох зорилготойг дурьдав.
Ерөнхийлөгч Европын Холбооны Элчин сайдуудыг хүлээн авч уулзав
