Бүх нийтээрээ уур амьсгалын өөрчлөлтийн мэдээлэлтэй болох нь чухал
Монгол Улсын Ерөнхийлөгчийн дэргэдэх “Иргэний танхим”-д “Уур амьсгалын өөрчлөлт ба дасан зохицох асуудал” сэдэвт нээлттэй цуврал хэлэлцүүлгийн 2 дахийгЕрөнхийлөгчийн Тамгын газар өнөөдөр зохион байгууллаа.
Монгол Улсын Ерөнхийлөгчийн Байгаль орчин, амьдрах орчны бодлогын зөвлөх Э.Зоригт хэлэлцүүлгийн зорилго, уур амьсгалын өөрчлөлт, дэлхийн дулаарлын эсрэг дэлхийн улс орнуудаас авч хэрэгжүүлж буй арга хэмжээ болон энэ талаарх Монгол Улсын төрийн тэргүүний байр суурийг товч тайлбарлав.
Энэ удаагийн хэлэлцүүлгээр ШУТИС-ын багш, доктор Р.Мижиддорж “Дэлхийн дулаарал ба монголын экологийн хямрал”, Ус цаг уурын хүрээлэнгийн захирал Г.Сарантуяа “Монголын уур амьсгалын өөрчлөлт, ирээдүйн хандлага” сэдвээр тус тус илтгэл тавьж, хэлэлцүүлэг өрнүүллээ.
Хэлэлцүүлэгт эрдэмтэн судлаачид, байгаль орчны чиглэлээр үйл ажиллагаа явуулдаг ТББ-уудын төлөөлөл, МУИС-ийн болон “Эко Ази” дээд сургуулийн экологийн чиглэлээр суралцаж байгаа оюутнууд, багш нар, иргэд, хэвлэл мэдээллийн байгууллагынхан оролцсон юм.
Хэлэлцүүлгээс гарч байгаа санал, шүүмжлэлийг төрийн бодлогод тусгуулан хэрэгжүүлэх, Монгол Улсын нийт иргэд уур амьсгалын өөрчлөлт дэлхийн дулаарлын сөрөг үр нөлөөг бууруулахад хувь нэмрээ оруулах, ийм арга хэмжээтогтмол зохион байгуулах нь чухал гэдгийг оролцогчид тэмдэглэлээ.
Хэлэлцүүлгийг хааж, Ерөнхийлөгчийн зөвлөх Э.Зоригт хэлэхдээ “Ийм хэлэлцүүлэг хийж байгаа нь уур амьсгалын өөрчлөлтийг тооцсон, түүнд тулгуурласан бодлогыг боловсруулж, төрийн баримт бичгүүдэд тусгуулах, иргэдээ энэ талын мэдээлэлтэй болгох зорилготой юм. Өнгөрсөн жил Ерөнхийлөгчийн заасан уур амьсгалын өөрчлөлтийн тухай хичээлээс хүүхдүүд багагүй мэдээлэлтэй болсон байна. Мэдээлэлтэй байж хүмүүс энэ тулгамдсан асуудлыг бодлогын баримт бичгүүдэд тусгуулна, бас дасан зохицоно шүү дээ” хэмээв.
Бүх нийтээрээ уур амьсгалын өөрчлөлтийн мэдээлэлтэй болох нь чухал
