Ерөнхийлөгчийн захидлыг БНХАУ-ын элчин сайдад гардуулав
Монгол Улсын Ерөнхийлөгчийн Тамгын газрын дарга Д.Баттулга БНХАУ-аас тус улсад суугаа Онц бөгөөд Бүрэн эрхт Элчин сайд Юи Хуняог өнөөдөр хүлээн авч уулзан БНХАУ-ын дарга Ху Жиньтаод Монгол Улсын Ерөнхийлөгч Ц.Элбэгдоржийн илгээж буй захидлыг гардуулав.
Монгол Улсын иргэн Ж.Дамдины БНХАУ-ын хилээр хар тамхи нэвтрүүлсэн гэх хэрэгт Шинжаан Уйгарын Өөртөө Засах Орны дунд шатны шүүх цаазаар авах ял ноогдуулсан бөгөөд түүнийг нь ШУӨЗО-ны Ардын дээд шүүх саяхан хэвээр баталсан байна. Үүнтэй холбогдуулан илгээсэн уг захидалд “Монгол Улсын иргэн Ж.Дамдинд оноосон цаазаар авах ялыг дахин нягтлан үзэж, түүний амийг уучилж өгөхийг Эрхэмсэг ноён Дарга Таниас хичээнгүйлэн хүсэж байна. Эрхэмсэг ноён Дарга Та миний хүсэлтийг нягтлан үзнэ гэдэгт итгэж байгаагаа илэрхийлэхийн ялдамд Танд эрүүл энх, сайн сайхныг хүсэн ерөөе” гэжээ.
Элчин сайд Юи Хуняо захидлыг улсынхаа даргад шуурхай уламжлахаа мэдэгдэв.
Ерөнхийлөгчийн захидлыг БНХАУ-ын элчин сайдад гардуулав
