Монгол, Японы бизнес чуулга уулзалтад оролцож үг хэлэв
“Бид гадаадын хөрөнгө оруулагчдад байгальд ээлтэй өндөр технологи ашиглах, хариуцлагатай, ил тод , нээлттэй зарчмаар ажиллах гэсэн болзол тавьдаг. Энэ болзлыг японы хөрөнгө оруулагчид бүрэн хангадаг гэж бид үздэг юм. Та бүхэн бол бидний итгэж найдаж, хамтран ажиллаж болох хөрөнгө оруулагчид мөн” гэж Ерөнхийлөгч Ц.Элбэгдорж Монгол, Японы бизнес чуулга уулзалтад ирсэн японы 200 гаруй хөрөнгө оруулагч, бизнес эрхлэгчдэд хандаж хэллээ.
“ Яагаад Монголд хөрөнгө оруулна гэж? Энэ асуултад гурван үндэслэлээр хариулж болно. Юуны өмнө Монгол, Японы харилцаа бол ард түмний сэтгэлээс үндэслэсэн онцгой харилцаа. Үүнийг илэрхийлсэн ганцхан тоо хэлье. Өнөөдөр Японд иргэдийн санаачилгаар байгуулагдсан найрамдал, хамтын ажиллагааны 70 гаруй нийгэмлэг ажиллаж байна. Харин Монголд 30 орчим байгаа. Энэ бол зөвхөн манай хоёр орны харилцаанд байгаа онцгой чухал нэг хэлбэр. Энэ бол манай хоёр ард түмний сэтгэлийн нөхөрлөл.
Дараагийн нэг чухал зүйл бол бид нэг үнэт зүйлтэй билээ. Хүний эрх, эрх чөлөө, хуулиа дээдэлсэн зах зээлийн эдийн засагтай гээд бидний үнэлэмж, үнэт зүйл нэг юм.
20 жилийн өмнө монголын ард түмэн сонголтоо хийсэн тэр цаг үеэс японы ард түмэн, Засгийн газар бидэнд тусалж дэмжиж ирлээ. Тэр үед эдийн засгийн байдал сайнгүй байсан. Гэвч өнөөдөр Монгол Улс эдийн засгийн хувьд бие даан хөгжих боломжтой болсон байна. Хэрэгтэй цагтаа нүдээ олсон хөрөнгө оруулалт, тусламж дэмжлэгийг япончууд бидэнд үзүүлдэг байлаа. Та бүхний өндөр технологи, ажлын ур чадвар бол монголчуудад танигдсан зүйл. Тийм учраас би Та бүхнийг цаг алдалгүй, бусдаас урьтаж ирээрэй гэж хэлмээр байна” гэж Ерөнхийлөгч ярилаа.
Уул уурхайн томоохон төслүүд хэрэгжихтэй холбогдуулж, гадаадын хөрөнгө оруулалтын бодлого ямар байх талаар мөн товч мэдээлсэн.
Монгол, Японы бизнес уулзалтад монголын талаас 50 орчим, японы талаас 200 гаруй бизнес эрхлэгч оролцов.
Монголын талаас Гадаадын хөрөнгө оруулалтын газрын дарга Б.Ганзориг хөрөнгө оруулалтын эрхзүйн нөхцөл байдлыг, Ашигт малтмалын газрын геологи судалгааны хэлтсийн мэргэжилтэн А.Тамираа газрын ховор элементийг ашиглах бодлогыг, ЗТБХБ-ын сайдын зөвлөх Ч.Ганбат Сайншандын аж үйлдвэрийн паркийн төслийг тус тус танилцууллаа.
Монгол, Японы бизнес чуулга уулзалтад оролцож үг хэлэв
