Монгол Улсын Ерөнхийлөгч Ц.Элбэгдорж өнөөдөр, манай улсад айлчилж байгаа АНУ-ын Конгрессын Төлөөлөгчдийн танхимийн гишүүн, цөөнхийн ахлагч Жо Боннер тэргүүтэй төлөөлөгчдийг хүлээн авч уулзлаа.
Ноён Жо Боннер төлөөлөгчдийг хүлээн авч уулзаж байгаад талархлаа илэрхийлээд, Төрийн тэргүүний чухал хариуцлагатай ажилд амжилт хүсч байна гэлээ.
АНУ бол монгол улсад ардчилал , зах зээлийн эдийн засаг тогтворжих үйл явцыг анхнаас нь дэмжиж ирсэн манай гуравдагч хөрш бөгөөд, манай хоёр орны харилцаа хамтын ажиллагааг улам бүр хөгжүүлэхийн төлөө чармайн ажиллах болно гэж Ерөнхийлөгч Ц.Элбэгдорж уулзалтынхаа эхэнд хэллээ.
Хоёр орны парламент хоорондын харилцаа хөгжиж, дээд хэмжээний айлчлалууд тогтмолжиж байгаа нь харилцааг хөгжүүлэхэд чухал түлхэц өгч байгааг тэрээр мөн тэмдэглэн хэлсэн юм.
АНУ-ын Афганистан болон Пакистанд явуулж байгаа бодлогыг Монгол Улс дэмжиж байгаагийн илрэл нь, Афганистан дахь олон улын энхийг сахиулах ажиллагаанд Монгол Улсын Зэвсэгт хүчний цэргийн багийг оролцуулах болсон явдал юм. Энэ байр сууриа ч мөн манай талаас дахин бататгалаа.
Уулзалтанд оролцогсод мөн хоёр орны харилцааны бусад асуудлаар санал солилцлоо.
