Монгол Улсын Ерөнхийлөгчийн айлчлал Киото хотноо үргэлжиллээ
Япон Улсад төрийн айлчлал хийж буй Монгол Улсын Ерөнхийлөгчийн айлчлал гуравдахь өдрөө Киото хотод үргэлжиллээ. Киото нь наймдугаар зуунаас хойш Японы нийслэл төдийгүй улс төр, эдийн засаг, соёлын төв болж байжээ. Энд цахилгаан, тээврийн болон нарийн хэмжүүрийн тоног төхөөрөмж, бас даавуу, химийн үйлдвэрлэл хөгжжээ. Нинтендо, НЕК, Омрон зэрэг дэлхийн шилдэг компани энэ мужид байрлаж үйл ажиллагаагаа явуулдаг. Цаашид мэдээлэл, технологийн томоохон компаниудыг тус мужид урьж шинэ бизнесийг дэмжих таатай орчин бүрдүүлэх талаар мужийн захиргаа идэвхтэй ажиллаж байгаа ажээ.
Киото мужийн захирагч К.Ямада, Киото хотын дарга Д.Кадокава, Киотогийн худалдаа, аж үйлдвэрийн танхимын дарга Т.Ватанабэ нар Монгол Улсын Ерөнхийлөгчийг хүндэтгэн зоог барив.
Тус хотын засаг захиргаа эрдэмтэд, үйлдвэрлэлийн түншлэлийг дэмжих зорилгоор тусгай хөтөлбөр хэрэгжүүлж, мужийн өмнөд хэсэгтээ технологийн иж бүрэн “тосгон”-ыг байгуулж байгаа тухай тус мужийн удирдлага танилцууллаа.
Киото хотыг Японы соёлын төв гэж үздэг юм байна. Энэ хотод шашны 2 мянга орчим эртний сүм хийд байдаг. ЮНЕСКО-гийн соёлын өвд бүртгэгдсэн нийт 17 барилга уран бүтээл тус хотод бий.
Монгол Улсын Ерөнхийлөгч ЮНЕСКО-гийн соёлын өвд бүртгэлтэй Эзэн хааны Сэнто гошо ордон, Кацүра Рикюү цэцэрлэгт хүрээлэнг үзэж сонирхлоо.
Монгол Улсын Ерөнхийлөгчийн айлчлал Киото хотноо үргэлжиллээ
