Үндэсний аюулгүй байдлыг цогцоор хангах нь тулгамдсан зорилт болж байна
Монгол Улсын Ерөнхийлөгчийн Тамгын газар, УИХ-ын Аюулгүй байдал, гадаад бодлогын байнгын хороо, Үндэсний аюулгүй байдлын зөвлөлийн ажлын албанаас хамтран төрийн ордонд “Монгол Улсын үндэсний аюулгүй байдлын үзэл баримтлал” сэдэвт сургалт-семинар энэ сарын 18,19-нд зохион байгууллаа.
Сургалт-семинарын үеэр Монгол Улсын Ерөнхийлөгчийн Тамгын газрын дарга Д.Баттулга Үзэл баримтлалыг шинэчлэн боловсруулах цаг үеийн шаардлага, ерөнхий агуулгын талаар ярьж, Үндэсний аюулгүй байдлын зөвлөлийн хэлтсийн дарга Ц.Даваадорж “Эдийн засгийн аюулгүй байдал”, тус зөвлөлийн референт Т.Булган “Хүрээлэн буй орчны аюулгүй байдал”, ШУТИС-ийн багш, профессор Т.Халтар “Мэдээллийн аюулгүй байдал” сэдвээр тус тус илтгэл тавьж, чөлөөт хэлэлцүүлэг өрнүүлсэн юм.
Эдийн засгийн бие даасан байдлаа хангаж хөгжих, байгальд ээлтэй, хүний аюулгүй, амгалан амьдрах боломжийг бүрдүүлсэн тогтвортой хөгжлийн загварыг буй болгох нь эдийн засгийн аюулгүй байдлыг хангах үндсэн нөхцөл мөн. Ингэхдээ олон тулгуурт, оновчтой бүтцийг бий болгох, хөрөнгө оруулалтын тэнцвэртэй бодлого явуулах, санхүүгийн салбарын аюулгүй байдлыг баталгаажуулах, эрчим хүч, эрдэс баялгийн болон гадаад худалдаа, интеграцын асуудлаар оновчтой байр суурь баримтлах замаар эдийн засгийн аюулгүй байдлыг хангахын чухлыг илтгэгч тэмдэглэж байв.
Байгаль орчны тэнцвэрийг хадгалж, усны нөөцийг хамгаалах, уур амьсгалын өөрчлөлт, газрын доройтлын сөрөг үр дагаврыг зөөлрүүлэх, биологийн олон янз байдлын хомсдлоос сэргийлэх, орчны бохирдол, байгалийн аюулт үзэгдэл, гамшгийн эрсдэлийг бууруулах нь хүний эрүүл оршин амьдрах, хүрээлэн байгаа орчны аюулгүй байдлыг хангах үндэс юм гэдгийг илтгэгч бас онцлон ярьж байлаа.
Цахим, засаг, цахим бизнес, цахим иргэн гээд цахим технологи бидний амьдралд асар өргөн үүрэг гүйцэтгэж байгаа энэ үед төрийн албан хаагчид мэдээллийн аюулгүй байдлыг хангаж ажиллах явдал нэн чухал болж буйг илтгэгч анхааруулаад ингэхийн тулд юу хийх ёстойг баримт жишээнд тулгуурлан өгүүлэв.
Үндэсний аюулгүй байдлыг цогцоор хангах нь тулгамдсан зорилт болж байна
