Монгол-Японы улстөрийн итгэлцэл өндөр түвшинд хүрч байна
Монгол Улсын Ерөнхийлөгч Ц.Элбэгдорж Япон Улсад төрийн айлчлал хийж байх үеэрээ тус улсын улстөрчид, өндөр албан тушаалтнуудтай уулзсан билээ. Тухайлбал Японы Парламентын Зөвлөхүүдийн танхимын дарга Т.Нишиока, Төлөөлөгчдийн танхимын дарга Т.Ёкомичи нартай уулзсан.
Монгол, Японы харилцааны хөгжилд Япон Улсын парламент,ялангуяа Төлөөлөгчдийн танхим, түүний гишүүд идэвхтэй хувь нэмэр оруулсаар ирсэнд талархаж байгаагаа Ерөнхийлөгч Ц.Элбэгдорж илэрхийлэв. Хоёр талын хүчин чармайлтаар Монгол, Японы улс төрийн харилцаанд харилцан итгэлцэл бэхжиж ирсэн бөгөөд цаашид Хөгжлийн албан ёсны тусламжийн зэрэгцээ хувийн хэвшлийн харилцаа, хөрөнгө оруулалтыг нэмэгдүүлэх замаар хоёр орны эдийн засгийн харилцааг шинэ шатанд гаргах эрмэлзэлтэй байгаагаа дурьдсан. Энэ хамтын ажиллагаа нь техник технологи, боловсон хүчний сургалт, хөрөнгө оруулалт гэсэн багц хэлбэрээр өргөжих нь зөв хэмээн Ерөнхийлөгч ярив.
Тэрээр “Монгол Улс нийгэм, аж үйлдвэрлэлийн бүхий л салбарт Японы дэвшилтэт, байгаль орчинд ээлтэй техник технологийг ашиглах , нэмүү өртөг шингэсэн бүтээгдэхүүн үйлдвэрлэж бусад орны зах зээлд гаргахад Японы дэмжлэгийг авч, харилцан ашигтай хамтран ажиллах нь бидний эрмэлзэл юм” гэлээ.
Японы парламентын Төлөөлөгчдийн танхимын дарга ноён Т.Ёкомичи хоёр орны харилцааг бүх талаар өргөжүүлэх эрмэлзэлтэй байдгаа нотлоод, ялангуяа улстөрийн харилцаа улам бүр эрчимжиж буйд сэтгэл хангалуун байдаг гэлээ.
Тэрээр “ Монгол Улс ардчиллын замыг сонгосноор олон түнш, найз нөхөртэй Азийн үлгэр жишээ орнуудын нэг болсон нь талархууштай. Тэдгээр найрсаг түншүүдийн нэг нь манай Япон Улс билээ. Монголын ардчиллын төлөө тууштай тэмцэгч Эрхэм Ерөнхийлөгч Танаас манай парламентын гишүүд Монголын ардчилал, хоёр орны найрамдалт харилцааны тухай сонсч байгаа нь цаг үеэ олсон хэрэг боллоо” гэсэн юм.
“Ардчилал бол бидний хамгийн дээдлэх ёстой үнэт зүйл мөн бөгөөд бидэнд байгаа энэхүү үнэт зүйл дээр тулгуурлан харилцааг өргөжүүлэх, хөгжүүлэх бүрэн боломжтой юм” гэж ноён Т.Нишиока хэлэв.
Мөн түүнчлэн , парламентийн Төлөөлөгчдийн танхим дахь Монгол-Японы харилцааг дэмжих Либераль Ардчилсан намын найрамдлын бүлгийн удирдлагыг хүлээн авч уулзлаа. Тус нам Японы эрх барьж буй үед парламентын гишүүн Торашимагийн санаачилгаар Монголд найрсаг ханддаг хэд хэдэн гишүүд хамтран энэ бүлгийг байгуулж байжээ.
Өнөөдөр тус бүлгийн даргаар ЛАН-ын Ерөнхий нарийн бичгийн дарга асан Такэбэ, гүйцэтгэх нарийн бичгийн даргаар Төлөөлөгчдийн танхимын гишүүн Мияжи нар ажиллаж байна.
Тус бүлэг Монголд оруулах японы хөрөнгө оруулалтыг дэмжих, Японы Засгийн газрын Хөгжлийн албан ёсны тусламжийн хүрээнд Монгол Улсын хөгжилд шаардлагатай дэд бүтцийн тусламжийг хэрэгжүүлэхэд нөлөөлөх хэлбэрээр ажилладаг.
Айлчлалын үеэр болсон өөр нэг тэмдэглүүштэй уулзалт нь Японы Зөвлөхүүдийн танхим дахь гурван намын Ерөнхий нарийн бичгийн дарга нартай хийсэн уулзалт байлаа.
Зөвлөхүүдийн танхим дахь Либерал ардчилсан намын Ерөнхий нарийн бичгийн дарга К.Косака, “Комэй” намын Ерөнхий нарийн бичгийн дарга Х.Хирата, Ардчилсан намын Ерөнхий нарийн бичгийн дарга А.Коба, танхимын гишүүн асан Т.Яно нар Монгол Улсын Ерөнхийлөгчийг хүндэтгэн зоог барилаа.
Хоёр орны найрамдал хамтын ажиллагааг шинэ шатанд гаргахын төлөө улстөрийн намууд ямар нэг зааг хуваагдалгүйгээр ажиллах болно гэдгээ энэ уулзалтын үеэр японы улстөрчид илэрхийлж байсан юм.
Монгол Улсын Ерөнхийлөгч Ц.Элбэгдоржийн, ардчилал болон манай улсуудын найрамдал нөхөрлөлийн талаар Японы парламентад хэлсэн үг онцгой сэтгэгдэл төрүүлсэн хэмээн, талархаж байлаа.
Монгол-Японы улстөрийн итгэлцэл өндөр түвшинд хүрч байна
