Монгол, Япон Улс спортын салбарт хамтын ажиллагаагаа эрчимжүүлнэ
Монгол Улсын Ерөнхийлөгчийн Япон Улсад хийсэн төрийн айлчлалын хүрээнд спортын салбарын хамтын ажиллагааны зарим эхлэл тавигдлаа. Тухайлбал Монгол, Япон хоёр орны биеийн тамирын дээд сургууль хамтын ажиллагааны гэрээ байгуулав. Уг гэрээнд Монголын талаас Үндэсний Биеийн тамирын дээд сургуулийн захирал Г.Лхагвасүрэн, Японы талаас Японы Биеийн тамирын их сургуулийн захирал Г.Танигама нар гарын үсэг зурсан юм.
Энэхүү гэрээгээр монголын талаас Японы биеийн тамирын их сургуульд оюутан сургаж дадлагажуулах, багш, дасгалжуулагч, туршлага солилцох зэрэг сортын салбарт боловсон хүчин, сайн тамирчин бэлтгэхэд үр нөлөөгөө өгөхүйц хамтын ажиллагаа эхлэлээ тавьж байна.
Японы биеийн тамирын дээд сургуулиас төрөн гарсан тамирчид Олимп болон дэлхийн аваргын тэмцээнүүдээс 33 алт, 34 мөнгө, 41 хүрэл медаль авч , улсынхаа биеийн тамир, спортын хөгжилд үнэтэй хувь нэмэр оруулж байгаа ажээ.
Мөн түүнчлэн “Мизуно” корпорацийн гүйцэтгэх захирал Ж.Уэжи Монгол Улсын Ерөнхийлөгчид бараалхлаа.
Энэхүү уулзалтад албан ёсны төлөөлөгчдөөс гадна Олимпийн аварга Н.Түвшинбаяр, “Мизуно” корпорацийн спортын сурталчилгаа хариуцсан газрын захирал М.Шюто нар оролцсон.
Түүнчлэн Монголын жүдогийн шигшээ багийн тамирчдад иж бүрэн хувцас бэлэглэх арга хэмжээ болов.
Хоёр улсын спортын салбарын хамтын ажиллагааг идэвхижүүлсэн энэхүү арга хэмжээний үеэр Монгол Улсын Ерөнхийлөгчийн спортыг дэмжсэн бодлогыг сайшааж байгаагаа японы талын албаны хүмүүс илэрхийллээ.
Монгол, Япон Улс спортын салбарт хамтын ажиллагаагаа эрчимжүүлнэ
