Монгол Улсын Ерөнхийлөгчийн зарлигаар БНСУ-ын “Олон улсын хамтын ажиллагааны агентлаг”-ийн Ерөнхийлөгч ноён Пак Дай-Вон-ыг “Найрамдал” медалиар шагналаа.
Ерөнхийлөгчийн зарлигт “Монгол Улс, БНСУ хоорондын найрсаг хамтын ажиллагааг өргөжүүлэн хөгжүүлэх, үндэсний аюулгүй байдлыг хангахад чиглэсэн цахим Монгол засаглал, бүртгэл мэдээллийн нэгдсэн тогтолцоо бий болгох, мэдээлэл, харилцаа, холбоо, технологи, экологи, хүнсний эрүүл мэнд, дэд бүтцийн салбарт үзүүлсэн оюуны болон материаллаг тусламж, өндөр ач холбогдол бүхий төслүүдийг хэрэгжүүлэхэд оруулсан үнэтэй хувь нэмрийг нь үнэлж БНСУ-ын “Олон улсын хамтын ажиллагааны агентлаг”-ийн Ерөнхийлөгч ноён Пак Дай-Вон-ыг “Найрамдал” медалиар шагнасугай” гэжээ.
“Монголчууд КОИКА буюу Солонгосын олон улсын хамтын ажиллагааны агентлагийг сайн мэднэ. Ялангуяа сүүлийн жилүүдэд манай улсад цахим засаглалыг хөгжүүлэхэд оруулж байгаа хувь нэмэрт нь бид гүнээ талархаж байдаг” гэж Ерөнхийлөгч Ц.Элбэгдорж хэллээ.
Дашрамд дурдахад, тэрээр Ерөнхий сайд байхдаа “Цахим монгол” хөтөлбөрийг санаачлан хэрэгжүүлж эхэлсэн бөгөөд, КОИКА энэ хөтөлбөрт анхнаас нь тусалж дэмжиж ирсэн билээ.
Нэр хүндтэй шагнал авсанд талархаж байгаагаа ноён Пак Дай-Вон илэрхийлээд, Монгол Улсад асар өндөр хурдаар хөгжиж байгаа мэдээллийн технологийн салбарт цаашдаа ч хамтран ажиллах болно гэдгээ илэрхийллээ.
Ноён Пак Дай-Вон нь 2008.5.22-оос эхлэн Солонгосын Олон улсын хамтын ажиллагааны агентлагийн Ерөнхийлөгчөөр ажиллаж байна.
