Монгол Улсын Ерөнхийлөгчийн илгээлт МҮХАҮТ-ын XVIII их хурлын төлөөлөгчдөд
МҮХАҮТ-ын ээлжит XVIII их хурлын төлөөлөгчид, эрхэм зочид, Танхимын нийт гишүүд, хамт олонд чин сэтгэлийн мэндчилгээ дэвшүүлж, их хурлын үйл ажиллагаанд өндөр амжилт хүсэн мэндчилье.
Хувийн хэвшил, бизнесийнхний нийтлэг эрх ашгийг тууштай хамгаалагч, төр-хувийн хэвшлийн түншлэлийн гол холбогч гүүр Монголын үндэсний худалдаа аж үйлдвэрийн танхимын хувьд 2010 он түүхэн тэмдэглэлт жил болж байна. Гуравхан сарын өмнө 50 жилийн түүхт ойгоо эрхэмсэг оршихуйн уриан дор тэмдэглэсэн бол өнөөдөр их хурлаа зарлан хуралдуулж, цаашдын зорилтоо тодорхойлж байна. Танай их хурлын гаргасан шийдвэр манай орны нийгэм, эдийн засаг, бизнесийн хэтийн хөгжилд чухал үүрэг гүйцэтгэнэ гэдэгт Монгол Улсын Ерөнхийлөгч миний бие итгэл дүүрэн байна.
Өнгөрсөн дөрвөн жилд МҮХАҮТ-аас Монгол Улсын бизнесийн эрх зүйн орчинг сайжруулах, хувийн хэвшлийг хөгжүүлэх, бодлогын өмгөөллийн болоод бизнесийг дэмжин урамшуулах, төр засагтай хамтран ажиллах, эдийн засгийг эрчимжүүлэх талаар хийсэн олон ажил, гаргасан санал санаачилга, хүрсэн үр дүнг нийт бизнесийн хүрээнийхэн төдийгүй монголын төр, олон улсын байгууллагууд ч зохих ёсоор үнэлж байгааг тэмдэглэхэд таатай байна. Тухайлбал МҮХАҮТ энэ дөрвөн жилд дэлхийн "ТОП-20" танхимын тоонд зүй ёсоор орсон байна.
МҮХАҮТ нь гадаад худалдааны бодлого тодорхойлох, хэрэгжүүлэх болон төр-хувийн хэвшлийн түншлэлийн механизмыг өргөжүүлэн дэлгэрүүлэх, байгаль орчныг хамгаалах, цэвэр үйлдвэрлэл, нийгмийн хариуцлагатай бизнесийг хөгжүүлэхэд Танхимын оруулж буй хувь нэмэр их юм.
Дэлхий нийтээр даяаршин хил хязгааргүй бизнесийн харилцаа, орчин үүсч буй өнөө үед аливаа улс орны хөгжлийн шинэ агуулга нь иргэн төвтэй, байгальд ээлтэй, өрсөлдөх чадвартай хөгжлийн шинэ бодлого, концепциор тодорхойлогдож байгааг харгалзан МҮХАҮТ-аас 2010 оныг "Ногоон эдийн засаг, ногоон бизнесийг дэмжих жил" болгон зарласныг Монгол Улсын Ерөнхийлөгчийн хувьд талархан дэмжиж байгаа бөгөөд энэ ч үүднээс Монгол Улсын Ерөнхийлөгчийн Тамгын газар, МҮХАҮТ, БОАЖЯ хамтран “Gгееn awards” буюу “Ногоон шагнал”-ын ёслолын арга хэмжээг жил бүр зохион байгуулж, байгаль орчныг хамгаалах чиглэлээр идэвх санаачилгатай ажиллаж буй байгууллага, иргэдийг шалгаруулан шагнахаар болсон билээ. Мөн МҮХАҮТ олон улсын эрчим хүчний /Energy globe Award/ шагналыг "New21" төслөөрөө авсан байна.
Монголын үндэсний худалдаа, аж үйлдвэрийн танхим, түүний мянга мянган гишүүд Монгол Улсын эдийн засаг, бизнесийн хөгжилд тэргүүлэх үүрэг гүйцэтгэж буй хувийн хэвшлийнхний саналыг илэрхийлэгч, тэдний эрх ашгийг хамгаалагчийн хүндтэй бөгөөд хариуцлагатай үүргээ цаашид ч нэр төртэй биелүүлнэ гэдэгт бүрэн итгэлтэй байна.
Их хурлын үйл ажиллагаа ажил хэрэгч өрнөн, оновчтой шийдэлд хүрч, МҮХАҮТ, монголын нийт бизнес эрхлэгчид Монгол Улсынхаа хөгжил цэцэглэлтийн төлөө, бизнесийн эрүүл саруул, таатай орчинг бүрдүүлэхийн төлөө улам ихийг хийж бүтээхийн өлзийтэй ерөөлийг өргөн дэвшүүлье.
Монгол Улсын Ерөнхийлөгч Ц.ЭЛБЭГДОРЖ
2010.12.08. Улаанбаатар хот
