Их Британи Умард Ирландын Нэгдсэн Вант улсаас Монгол улсад суух Онц бөгөөд Бүрэн эрхт Элчин сайд ноён Уильям Эндрю Диксон өнөөдөр МУ-ын Ерөнхийлөгчид итгэмжлэх жуух бичгээ барилаа.
Элчин сайдыг жуух бичгээ барьсантай холбогдуулан Ерөнхийлөгч Ц.Элбэгдорж хүлээн авч уулзан хоёр орны харилцаа хамтын ажиллагааны талаар ярилцлаа.
Уулзалтын эхэнд Элчин сайд ноён Диксон Ерөнхийлөгчид хандаж сонгуульд ялалт байгуулсанд нь баяр хүргээд, хоёр орны харилцааны асуудлаар болон бүс нутгийн аюулгүй байдлын талаар хөндөж ярилаа.
Тэрээр, Монгол улс НҮБ-ын энхийг сахиулах үйл ажиллагаанд оролцсоор ирсэнд талархаж байдгаа илэрхийлсэн юм.
Ерөнхийлөгч Ц.Элбэгдорж хариу хэлэхдээ, Ерөнхийлөгчөөр сонгогдсоны гол ач холбогдол маань юуны өмнө Монгол оронд шударга ёс, хуулийн эрх тэгш үйлчлэлийг тогтоох, ард түмний аж амьдралын түвшинг дээшлүүлэх явдал юм гэж онцлоод, Монгол улс НҮБ-ын энхийг сахиулах үйл хэрэгт оролцож байгаа нь дэлхийн энх тайвны асуудал зөвхөн томоохон улсуудын үүрэг хариуцлага биш болсон гэдгийг нотолж байгаа юм гэв.
Мөн Ерөнхийлөгч энэ албанд томилогдсонд нь ноён Элчин сайдад баяр хүргээд, хоёр орны хамтын ажиллагааны хөгжил цэцэглэлд их хувь нэмэр оруулахыг хүсэн ерөөлөө.
