ХБНГУ-аас Монгол Улсад суугаа Онц бөгөөд Бүрэн эрхт Элчин сайд К.Фишер өнөөдөр Монгол Улсын Ерөнхийлөгчид бараалхаж, 2005 онд Бонн хотноо гарсан “Чингис хаан ба түүний өв: Монголчуудын дэлхийн эзэнт гүрэн” үзэсгэлэнгийн товхимол болох “Чингис хаан ба түүний өв” номын монгол хэлээр хэвлэгдсэн дээжийг гардуулав.
Ерөнхийлөгч Ц.Элбэгдорж Ерөнхий сайд байхдаа “Чингис хаан ба түүний өв” үзэсгэлэнг ХБНГУ-ын канцлер Г.Шройдерын хамт ивээлдээ авч, 2005 онд Германы Бонн хотноо нээж байсан юм. Энэхүү үзэсгэлэнгийн үеэр гарсан олон орны монгол судлаачдын хамтын бүтээл болох “Чингис хаан ба түүний өв ” товхимол герман хэлээр гарч байжээ.
Харин өдгөө уг номыг монгол хэлээр хэвлэсэн байна.
Элчин сайд К.Фишер ярихдаа “ Их Монгол Улс байгуулагдсаны 800 жилийн ойг угтсан, дэлхий даяар хамгийн том, хамгийн үнэн бодитой сурталчилгаа болсон “Чингис хаан ба түүний өв” үзэсгэлэнг Та Ерөнхий сайд байхдаа ивээлдээ авч амжилттай зохион байгуулж байсанд дахин талархал илэрхийлье. Монгол Улсын түүх, соёлын талаар үнэн бодитой мэдээллийг дэлхий даяар түгээхэд уг үзэсгэлэн үнэлж баршгүй хувь нэмрээ оруулсан юм. Энэхүү үзэсгэлэнгийн хэвлэмэл хувилбар болох товхимол Монголын Тулгар төр байгуулагдсаны 2220 жилийн ойг угтаж ийнхүү монгол хэлээр гарч байгаад бид баяртай байна. Нийт 2950 ширхэг номыг Монголын талд бэлэг болгон өгч байна” гэлээ.
Ерөнхийлөгч Ц.Элбэгдорж монголын түүх соёлын томоохон сурталчилгаа болсон “Чингис хаан ба түүний өв” товхимлыг герман, монгол хэлээр хэвлүүлсэнд талархал илэрхийлээд, уг номыг улсын бүхий л их дээд сургуулиуд, аймаг сум бүрийн номын санд хүргэх хүсэлтэй байгаагаа илэрхийллээ.
