Дипломат корпусын ахлагч, Элчин сайд Фишэр ээ,
Элчин сайд, Хэргийг түр хамаарагч нар аа,
Олон улсын байгууллагын төлөөлөгчид өө,
Хатагтай, ноёд оо,
Та бүхний энэ өдрийн амрыг айлтгая.
Улиран хоцорч буй оны амжилт бүтээлээ бахдан харж, алдаа сургамжаа эргэн дэнслэж, ирж буй шинэ оны босгон дээр Та бүхэнтэй уламжлал ёсоор уулзаж байгаадаа туйлын таатай байна.
Та бүхний дэмжлэг, хамтын ажиллагааны үрээр 2010 оны нэгэн хатуу өвлийг монголчууд бид даван туулж гарлаа. Эдийн засгийн хохирол ихтэй байсныг, түүнээс болж малчдын амьжиргаа ихээхэн туйлдсныг Та бүхэн сайн мэдэж буй. Зудын сургамж Монголын төр засагт төдийгүй манай хөдөөгийхөнд дахин нэгийг хэлж, нөгөөг санагдуулав.
Гэсэн хэдий ч 2010 онд манай улсын эдийн засгийн өсөлт нилээд сайн гарах төлөвтэй байна. Дэлхийн эдийн засгийн өсөлт ажиглагдаж, түүний дотор манай өмнөд хөрш – БНХАУ болон Азийн бусад улс орны эдийн засгийн өсөлт бидэнд сайнаар нөлөөллөө. Энэхүү таатай мэдээг Монголын уул уурхайн салбаргүйгээр төсөөлөх аргагүй. Бид уг салбарыг түшиглэн эдийн засгийн тогтвортой хөгжлийг бий болгохын төлөө та бүхэнтэй цаашид нягт хамтран ажиллах болно.
2010 он олон улсын харилцаанд онцлог жил байв. Афганистаны аюулгүй байдал, Солонгосын хойгийн тогтворгүй байдал, Мянганы хөгжлийн зорилтуудын хэрэгжилт, уур амьсгалын өөрчлөлт, дэлхийн эдийн засгийн хямралын нөлөө гээд олон асуудал, тэдгээртэй уялдаа бүхий сорилт, заналхийлэл бидний анхаарлын төвд явж ирлээ.
Монгол Улсын Үндэсний аюулгүй байдлын үзэл баримтлалыг шинээр УИХ-аар 7 дугаар сард батлуулав. Үүнтэй нийцүүлэн Гадаад бодлогын үзэл баримтлалаа шинэчлэн найруулах ажлыг хийж байна.
Монгол Улсын гадаад харилцаа 2010 он олон сайхан үйл явдлаар дүүрэн жил байлаа. Бид гадаад бодлогын нэгдмэл, залгамж чанарыг хадгалан, энхийг эрхэмлэсэн, бие даасан, нээлттэй, олон тулгуурт гадаад бодлогоо тууштай үргэлжлүүлж, гадаад харилцааны үр өгөөжийг дээшлүүлэх замаар үндэсний хөгжлөө тэтгэхэд чиглэсэн үйл ажиллагааг идэвхтэй явуулж ирлээ.
Миний бие БНХАУ, Дани, Финланд, Японд төрийн айлчлал хийж, Улсын Их хурлын дарга Өмнөд Солонгос, Энэтхэг, Вьетнамд, Ерөнхий сайд ОХУ, Канад, Унгарт тус тус албан ёсоор айлчлав. Мөн БНХАУ-ын Төрийн Зөвлөлийн Ерөнхий сайд, БНЧУ-ын Ерөнхий сайд, Энэтхэгийн Парламентийн спикер, Туркийн Үндэсний их хурлын дарга зэрэг гадаадын өндөр түвшний төлөөлөгчдийг эх орондоо хүлээн авлаа. Эдгээр айлчлал манай орнуудын найрсаг харилцаа, хамтын ажиллагааг бататган бэхжүүлэхэд чухал ач холбогдолтой байв.
2010 онд НҮБ, түүний системийн байгуулагууд, олон улсын бусад байгууллага, олон талт механизмын хүрээн дэх хамтын ажиллагааг өргөжүүлэхийг чухалчлан ажиллаж, тодорхой үр дүнд хүрлээ.
Европын Холбоотой Түншлэл, хамтын ажиллагааны хэлэлцээрийг өчигдөр үзэглэсэн нь түүхэнд бичигдэн үлдэнэ хэмээн найдаж байна. Хэлэлцээрийг байгуулснаар Монгол Улс, Европын харилцааг шинэ түвшинд гарч, хамтын ажиллагааны хүрээ өргөжих юм. Мөн Европын Холбооны стандарт, хэм хэмжээг Монгол Улсад нэвтрүүлэх ажлыг эхлүүлээд байна.
ШХАБ, АСЕМ, Азид хамтын ажиллагаа, итгэлцлийг бэхжүүлэх зөвөлгөөн, Афганистаны асуудлаарх Умард Атлантын зөвлөлийн дээд хэмжээний уулзалт, Мянганы хөгжлийн зорилтуудын хэрэгжилтийг хянан хэлэлцэх НҮБ-ын Ерөнхий Ассамблейн өндөр түвшний уулзалт зэрэгт бид төр засгийн тэргүүн нарын түвшинд оролцсоноороо олон талт болон бүс нутгийн хамтын ажиллагаанд өөрийн хувь нэмрээ оруулах Монгол Улсын хүсэл эрмэлзлийг илэрхийллээ хэмээн үзэж байна.
Миний бие дэлхийн уур амьсгалын өөрчлөлтийн асуудалд онцгой анхаарал тавьж ирсэн. Уур амьсгалын өөрчлөлтийн улмаас эрчимтэй цөлжиж байгаа Өмнөговь аймгийн Баяндалай сумын Гашууны хоолойд Монгол Улсын Засгийн газар энэ оны 8 дугаар сард тусгай хуралдаан хийж, дэлхийн хамтын нийгэмлэгт хандан илгээлт гаргасан нь энэ асуудалд өөрийн орны болон бусдын анхаарлыг чиглүүлэхэд үр дүнгээ өгнө хэмээн итгэж байна.
Монгол Улсын санаачлага, идэвхтэй үйл ажиллагааны дүнд Далайд гарцгүй хөгжиж байгаа орнуудын Олон улсын судалгааны төв байгуулах олон талт хэлэлцээрийг боловсруулж батлуулав.
Монгол Улс дахь хүний эрхийн төлөв байдлын тухай үндэсний анхдугаар илтгэлийг НҮБ-ын шинэ механизмын дагуу бие даан хариуцан боловсруулж, улмаар Хүний эрхийн зөвлөлд хэлэлцүүллээ.
Монгол Улс 2011 оны 7 дугаар сараас Ардчилсан орнуудын хамтын нийгэмлэгийг хоёр жилийн хугацаатайгаар даргалах юм. Ардчилсан хөдөлгөөний 20 жилээ энэ онд тэмдэглэж буй манай улсын хувьд энэ ажил манай улсын нэр хүндийг олон улсын тавцанд улам өргөж, ардчиллыг бэхжүүлэх үйлсэд чухал хувь нэмэр оруулах нь дамжиггүй. Энэхүү хариуцлагатай, нэр төртэй үүргийг Та бүхний дэмжлэг туслалцаатайгаар гүйцэтгэхийн төлөө хүчин чармайлт гарган ажиллах болно.
Гадаад харилцааны салбарын хувьд ирэх 2011 он бас нэг онцлог жил байх болно. Монгол Улсад орчин цагийн дипломат алба үүсч хөгжсөний 100 жилийн ой, мөн Хүннү гүрэн байгуулагдсанаар тоологдох Монголын тулгар төрийн 2220 жилийн ой, Үндэсний эрх чөлөөний хөдөлгөөний 100 жилийн ой, 2011 онд тохионо. Түүнчлэн Монгол Улс НҮБ-д элсэн орсны 50 жилийн ой болно. Эдгээр түүхт ойн хүрээнд олон ажил, арга хэмжээ хэрэгж үүлэхээр төлөвлөж байна.
Монголчууд бидэнтэй үргэлж эв найртай хамт ажиллаж, аж төрж ирсэн Та бүхэнд талархаж байна. Та бүхний ажил үйлс ирэх он жилүүдэд өөдрөг сайхнаар үргэлжилнэ хэмээн итгэж, мөн ийм байхыг ерөөж, энэ хундагыг өргөе!
Та бүхэнд шинэ оны мэнд дэвшүүлье!
