Монгол Улсын Ерөнхийлөгч Ц.Элбэгдорж зарлиг гарган, хэвлэл мэдээлэл, сэтгүүл зүйн салбарт олон жил ажиллаж, ардчилсан нийгмийн үнэт зүйлсийг бэхжүүлэн, чөлөөт сэтгүүл зүйг хөгжүүлэхэд оруулсан хувь нэмрийг нь үнэлж, зарим сэтгүүлчдийг төрийн одон, медалиар шагнав.
“МОНЦАМЭ” агентлагийн “Монгол мессенжер” сонины эрхлэгч Борхондойн Индраг Хөдөлмөрийн гавъяаны улаан тугийн одонгоор, Монголын Үндэсний олон нийтийн телевизийн захирал Цагааны Оюундарь, тус телевизийн уран бүтээлийн 3 дугаар нэгдлийн редактор Дамдинсүрэнгийн Долгорсүрэн, тус телевизийн уран бүтээлч Гэндэнжамцын Бадамсамбуу, Хөвсгөл аймаг дахь Монголын Үндэсний радиогийн сурвалжлагч Балдангийн Бат-Эрдэнэ, “Өнөөдөр” сонины гадаад мэдээний албаны дарга Хурандаагийн Энхтуяа, “МОНЦАМЭ” агентлагийн “Хүмүүн бичиг” сонины эрхлэгч Сампилын Алтанцэцэг, “Өдрийн сонин”-ы орлогч эрхлэгч Жамбалын Сандагдорж, “Улстөрийн тойм” сонины эрхлэгч Лувсанбямбын Мөнхбаясгалан, “NBS” телевизийн тоймч Сүхээгийн Наранбаатар, “25 дугаар суваг” телевизийн мэдээний албаны дарга Самбуунямын Насанжаргал, Дорнод аймгийн “Гэгээ” телевизийн редактор Отгонбаатарын Алтансүх, “ТВ-5” телевизийн тоймч Мөнхөөгийн Амарбаяр, “Ардчилал” сонины сэтгүүлч Жигжидийн Цэсэн, Ховд аймгийн “Ховдын мэдээ” сонины эрхлэгч Агвааны Бямбасүрэн нарыг Алтан гадас одонгоор, Завхан аймгийн “Завхан” телевизийн зураглаач Жасрайн Ганбат, “Шууд” телевизийн мэдээний албаны дарга Жанцмаагийн Батхишиг, “25 дугаар суваг” телевизийн найруулагч Давгын Жамъянжав, “Ардчилал” сонины орлогч эрхлэгч Нэргүйн Ууганбаяр, “Ийгл” телевизийн сэтгүүлч Ноовын Баасандамба, “News.mn” сайтын эдийн засгийн албаны редактор Загдсүрэнгийн Боргилмаа, “Ийгл” телевизийн мэдээний албаны дарга Пүрэвийн Жаргал, “UBS” телевизийн сэтгүүлч Ишцогийн Буянжаргал, “ТВ-9” телевизийн мэдээллийн албаны дарга Баасанжавын Отгон, “Үндэсний шуудан” сонины сурвалжлагч Бибишийн Цогнэмэх, Хөвсгөл аймаг дахь “Лха” телевизийн салбарын захирал Очирбатын Лхагвамаа, “NBS” телевизийн найруулагч Дандарын Сангибат, “Өнөөдөр” сонины тоймч Батдоржийн Энхцэцэг, “Ардчилал” сонины нийгэм, эдийн засгийн албаны сэтгүүлч Тэгшээгийн Жанцан, “Баянхонгор таймс” сонины эрхлэгч Дунжийн Батдамба, “Сэлэнгийн мэдээ” сонины эрхлэгч Норжмаагийн Оюумаа нарыг Хөдөлмөрийн хүндэт медалиар тус тус шагнасан юм.
Уг шагналыг Монгол Улсын Ерөнхийлөгч Ц.Элбэгдорж өнөөдөр гардуулж баяр хүргэлээ. Ерөнхийлөгч хэлэхдээ “Та бүхэнд Монгол түмэн эрх чөлөө, тусгаар тогтнолоо сэргээн тогтоосны энэ гайхамшигт өдрийн мэндийг хүргэе. Уламжлал ёсоор өнөөдөр хэвлэл мэдээллийн ажилтнуудад төр хүндэтгэл үзүүлж байна. Нээлттэй нийгмийн гайхамшиг бол түүний чөлөөт байдалд оршдог. Нээлттэй нийгмийн гайхамшиг бол гайхамшгийг бүтээх боломжид оршдог.
Ийм боломж нээлттэй нийгэмд хүн бүрт заяадаг. Нээлттэй нийгмийн гайхамшиг бол хаалттай сэдэв гэж байдаггүйд оршдог.
Нээлттэй нийгмийн мөн чанар нь хэвлэл мэдээллийн эрх чөлөөгөөр, үзэл бодлоо чөлөөтэй илэрхийлэх иргэний эрх чөлөөгөөр илэрдэг. Тэгэхээр нээлттэй нийгмийн шүншиг нь чөлөөт хэвлэл мэдээллийн хэрэгсэл юм. Тэр шүншгийг бүтээгч, хадгалагч, хамгаалагчид нь хэвлэл мэдээллийн байгууллагын ажилтнууд сэтгүүлчид, уран бүтээлчид юм.
Ийм ариун хөдөлмөр, нэр төртэй хөдөлмөр, хэцүү ажил үнэлэгдэх ёстой. Хамт олноо төлөөлөн ажил хөдөлмөрөө үнэлүүлж байгаа Та бүхэнд Монголын ард түмний нэрийн өмнөөс, төрийн нэрийн өмнөөс баяр хүргэе. Ажлаа улам сайн хийгээрэй. Бүгдэд нь ирж буй шинэ оны мэнд хүргэе” гэв.
