Монгол Улсын Ерөнхийлөгчийн ивээл дор зохиож буй “Зураг төслийн автоматжуулсан систем CAD/CAM-ын улсын анхдугаар олимпиадын нээлт Шинжлэх ухаан, технологийн их сургууль дээр өнөөдөр боллоо.
Нээлтэд Ерөнхийлөгчийн Тамгын газрын дарга Д.Баттулга оролцож үг хэлэв. Тэрээр хэлэхдээ “Төмөрлөг, машин үйлдвэрлэлийн үндэсний холбооныхон Ерөнхийлөгчийн Тамгын газарт хандаж, бид японы үйлдвэрлэгчидтэй хамтарч машины эд анги хийж байна. Энийг дэмжин шинэ салбар гаргаж ирэх шаардлагатай байна гэсэн юм. Монгол Улс үйлдвэрлэгч орон болох ёстой гэсэн үзэл баримтлалыг аль ч нам сонгуулийн болон үйл ажиллагааны хөтөлбөртөө тусгасан байдаг.
Монгол өнөөдөр энэ чиглэл рүү анхны алхмуудыг хийж байгаа. Монгол Улсын Ерөнхийлөгч ч үйлдвэржилтийн асуудлыг анхааралдаа байлгадаг юм. Тиймээс Ерөнхийлөгч энэ олимпиадыг дэмжин жил бүр зохиодог байя, бас ивээлдээ авья гэж үзсэн юм. Ингээд та бид өнөөдөр энэ олимпиадынхаа нээлтийг хийж байна. Нөгөөтэйгүүр японоос ирсэн хамтран ажиллагч компанийн нь захирал нь бидэнтэй уулзаж, монголчуудын оюуны чадавхи, хөдөлмөрийн бүтээмж япончуудынхаас дутахааргүй юм гэж хэлж байсан.
Энэ хүн монголд нэлээд хэдэн жил ажилласан юм билээ. Саяхан Монгол Улсын Ерөнхийлөгч Японд айлчилж, олон зүйлийг ярилцан зөвшилцсөн. Тэдний нэг нь японы технологийг монголд ургуулах асуудал байсан. Миний бодлоор тэр технологийг ургуулах гэж буй хүмүүс өнөөдөр энэ олимпиадад оролцож байна. Японы технологийг монгол инженерүүд нэвтрүүлж, улам нарийсган хөгжүүлнэ гэдэгт итгэж байна. CAD/CAM-ын улсын анхдугаар олимпиадад оролцож буй инженер, оюутан залуучууддаа амжилт хүсье” гэлээ.
Олимпиадын нээлтэд Ерөнхийлөгчийн зөвлөх Р.Болд, Л.Эрхэмбаяр, ХХААХҮ-ийн дэд сайд Х.Золжаргал, Төмөрлөг, машин үйлдвэрлэлийн үндэсний холбооны дэд ерөнхийлөгч, Цахилгаан тээвэр компанийн захирал Д.Жаргалсайхан, ШУТИС-ийн удирдлагууд оролцов.
Инженерийн зураг төсөл, үйлдвэрлэлийн автоматжуулсан систем бүхий технологийг сурталчлах, оюутан, зохион бүтээгч инженерүүдийн мэдлэг чадварыг хөгжүүлэх, сургалт, үйлдвэрлэлийг орчин үеийн түвшинд хүргэх, дэвшилтэт өндөр технологид үндэслэн боловсрол, бизнесийн байгууллагын хамтын ажиллагааг өргөжүүлэх зорилгоор энэ улсын анхдугаар олимпиадыг Монгол Улсын Ерөнхийлөгчийн ивээл дор Шинжлэх ухаан, технологийн их сургууль, Төмөрлөг, машин үйлдвэрлэлийн үндэсний холбоо санаачлан хийж буй юм. Өнөөдөр бидний өдөр тутмын ахуйн хэрэглээ болсон гар утас, тоос сорогч, хөргөгчөөс эхлээд компьютерийн чип, асар том сансарын техник, тоног төхөөрөмж хүртэлх бүтээгдэхүүнийг зураг, төсөл, үйлдвэрлэлийн програм хангамжгүйгээр төсөөлөхийн аргагүй юм.
Олимпиадад 81 оюутан, 46 инженер техникийн ажилтан оролцохоор ирсэн байлаа.
