Монгол улсын Ерөнхийлөгч Ц.Элбэгдорж өнөө өглөө бизнесийн төлөөллийг Төрийн харшид урин өглөөний цай хамт ууж Монголын бизнесийн байгууллагуудын өрсөлдөх чадварын талаар санаа бодлыг нь сонсож харилцан ярилцлаа.
“Өрсөлдөх чадвар” сэдвээр хийсэн энэхүү уулзалтад Мобиком, Жи-мобайл, Эм Си Эс зэрэг манай нэр хүнд бүхий компаниуд, Хас,Голомт банкны удирдлагууд мөн Монголбанкны тэргүүн дэд ерөнхийлөгч Б.Энххуяг, Монголын үндэсний худалдаа аж үйлдвэрийн тэнхимийн тэргүүн С.Дэмбэрэл нар хүрэлцэн ирсэн байлаа.
Ерөнхийлөгчийн эрдэс баялаг, эрчим хүч, дэд бүтцийн бодлогын зөвлөх П.Цагаан уулзалтыг нээж үг хэлэхдээ, өнөө цагт аливаа улс орны тусгаар тогтнолоо хамгаалах асуудал нь тухайн орны бизнесийн өрсөлдөх чадварыг хэрхэн хөгжүүлэхээс хамааралтай болжээ гэж онцлон дурдаад цаашид энэ уулзалтыг уламжлал болгон хийж байхаар болсныг дуулгав.
Уулзалтын үеэр Ньюком группын ТУЗ-ийн дарга Ц.Болдбаатар өрсөлдөх чадварын талаар сонирхолтой илтгэл тавьсан байна.Тэрээр бизнесийн орчны өөрчлөлт өдрөөр хэмжигдэх болсныг дурдаад орчин цагт өрсөлдөх чадварыг нь тухайн байгууллагын хийж бүтээснээр биш харин хэтийн зорилгоо хэрхэн төлөвлөж байгаагаар нь дүгнэх болжээ гэж хэлсэн байна.
