Нийслэлийн агаарын бохирдлыг бууруулах тухай хуулийн төслийг Ерөнхийлөгчийн дэргэдэх “Иргэний танхим”-д өнөөдөр нээлттэй хэлэлцүүлж, УИХ-ын зарим гишүүн, холбогдох яам, нийслэлийн удирдлага, төрийн бус байгууллагын төлөөлөл, Мянганы сорилын сангийн төслийнхөн зэрэг хүмүүс оролцон саналаа хэлэв.
Ерөнхийлөгчийн Тамгын газрын дарга Д.Баттулга хуулийн төлийн талаар танилцуулав. Тэрээр хэлэхдээ “ҮАБЗ-ийн өнгөрсөн пүрэв гаригийн өргөтгөсөн хуралдаанаар нийслэлийн утаа, агаарын бохирдлын асуудлыг хэлэлцээд хууль гаргахаар тогтсон. Энэ хуулиар агаарын чанарыг сайжруулах бүсийг тогтоож, тэнд мөрдөх дэглэм, эрх зүйн байдалтай холбогдсон харилцааг зохицуулах юм. Хуулийн төсөлд хязгаарлалтын бүсэд дэнжийн мянга, зуун айл, гуравдугаар хорооллын арын гэр хорооллыг оруулаад байна. Шөнийн хөнгөлөлттэй цагт оройн 6 цагаас өглөөний 10 цаг гэж тусгаж байгаа. Одоогийн мөрдөж буй шөнийн үнэ тарифийг нь 50 хувь хөнгөлж, нэг киловаттыг 20 төгрөг болгох, дэд станц, тоолуурын найдвартай ажиллагааг хангах, төсвийн тодотголоор хөрөнгийн асуудлыг шийдвэрлэх, УИХ-ын дэргэд агаарын бохирдлын эсрэг үндэсний хороо байгуулах, утаагүй түлш хэрэглэж буй айл өрхөд хөнгөлөлт үзүүлэх, хууль зөрчсөн иргэн, албан тушаалтанд хариуцлага тооцох асуудлуудыг тусгалаа. Ирэх баасан гаригт УИХ-д өргөн барьж, чуулган завсарлахаас өмнө хэлэлцүүлье гэсэн бодолтой байна. Энэ төслийн талаар та бүхэн асууж болно. Мөн та бүхний саналыг сонсох гэсэн юм” гэв. Тавдугаар цахилгаан станцын талаар Засгийн газарт чиг өгсөн тухай бас дурьдлаа.
УИХ-ын гишүүн С.Оюун тавдугаар цахилгаан станцыг хамгийн хурднаар гэхэд хэзээ барьж дуусгах боломж байна, энэ хүртэл хууль гарлаа гэхэд хэрэгжих боломж бий юу гэж асуув. Үүнд Тамгын газрын дарга Д.Баттулга “ОХУ-ын Галуут нуурын станцаас 40, дотоодоосоо 25-30 мега ваттын боломж бий болгох тооцоо бий. Ингэснээр 30 мянган айл хамруулах нөхцөл бүрдэнэ. Мянганы сорилын сангийн төслөөр гэрийн дулаалаг, зуух, халаагуур хөнгөлөлттэй үнээр олгоно. Тавдугаар цахилгаан станцыг гуравдугаар цахилгаан станцын буурин дээр байгуулах, ингэхдээ шуурхай хийвэл энэ ондоо эхний зуухыг ашиглалтад оруулах боломж бий” гэв. Дараагийн хүн “Тоос шорооноос агаар их бохирдож байна. Энэ талаар юу тусгав? Хүн амын механик өсөлтийг яаж зохицуулах вэ? “ гэж асуухад Улаанбаатарын хөрс бүхэлдээ бохирдсон, дахин нөхөн сэргээх боломжгүй, хүн амын өсөлтийг өөр хуулиар зохицуулна гэж хариуллаа. Энэ талаар Нийслэлийн эрх зүйн байдлын тухай хуулийн төсөлд тодорхой зүйл тусгасан ажээ. УИХ-ын гишүүн Г.Баярсайхан агаарын бохирдолд хүүхэд хамгийн хорддог тул нийслэлийн эргэн тойрны олон амралт, зусланд тэднийг амрааж байвал ямар вэ, эрүүл мэндэд бага асуудал гэж байдаггүй учраас ийм санал тавьж байна гэв. Нийслэлийн Засаг дарга Г.Мөнхбаяр шингэрүүлсэн хийн түлшний үйлдвэр мэт хувийн хэвшлийн хийж болох зүйлийн тоног төхөөрөмжүүдийг НӨАТ, гаалийн татвараас чөлөөлөх асуудлыг оруулмаар байна гэсэн санал хэллээ. УИХ-ын гишүүн Л.Гантөмөр стандартад нийцсэн халаагчийг ийм хөнгөлөлтөд хамруулах хэрэгтэй гэж нэмэв. УИХ-ын гишүүн Д.Ганхуяг “Нийслэлийн эрх зүйн байдлын болон энэ хуулийн төслийг тал талаас нь сайн анхаарч хэлэлцэх хэрэгтэй юм. Ер нь хот төлөвлөлтийн хэрэгжилтийг нэг хэлэлцмээр юм байна” гэсэн санал хэллээ. Энэ мэтчилэн хүмүүс олон санал хэлэв. Тухайлбал иргэдийн оролцоо дэмжлэгийн тухай тусгах, хар тугалгатай бензин, дизелийн түлш хэрэглэхийг хориглох, агаарын бохирдлын хор холбогдлын талаар мэдээлэл сурталчилгаа хийх, хуулийг хэрэгжүүлэх хөрөнгийн эх үүсвэрийг заах, сэргээгдэх эрчим хүч ашиглах, угаасан нүүрс хэрэглүүлэх, гэр хороолол төдийгүй зусланг хуульд хамруулах, хуучин машин гаднаас оруулахыг жилээр нь хязгаарлах, хуулийг тодорхой хугацаанд хэрэгжүүлээд зогсоох талаар саналууд хэлж байв. Мөн Агаарын бохирдлын эсрэг үндэсний хороог Ерөнхийлөгчийн дэргэд байгуулах нь зөв гэсэн санал ч гарлаа.
Ерөнхийлөгчийн Тамгын газрын дарга Д.Баттулга саналуудыг ажлын хэсэг авч үзэх болно гэж хэлэв.
