Олон Улсын Санхүүгийн Корпорацийн Гүйцэтгэх Дэд Ерөнхийлөгч бөгөөд Ерөнхий захирал, ноён Ларс Тунелл тэргүүтэй төлөөлөгчид өнөөдөр Монгол Улсын Ерөнхийлөгч Ц.Элбэгдоржид бараалхаж, ОУСК-ийн Монголд хэрэгжүүлж байгаа ажлынхаа талаар танилцуулж, санал солилцов.
Ерөнхийлөгч Ц.Элбэгдорж, Монгол улсад хэрэгжих дэд бүтэц, уул уурхайн том төслөөс гадна банк санхүүгийн салбарыг хөгжүүлэхэд олон улсын хэмжээний туршлагатай, санхүүгийн байгууллагуудын дэмжлэг чухал болохыг хэллээ. Тэрээр мөн, байгальд ээлтэй, эрчим хүч хэмнэхэд чиглэсэн жижиг, дунд үйлдвэрийг дэмжиж, Улаанбаатар хотын утаа, агаарын бохирдлыг бууруулах талаар хамтран ажиллахыг уриалав. ОУСК-ийн удирдлага Ерөнхийлөгч Ц.Элбэгдоржийн хүсэлтийг анхааралдаа авч, ажиллана гэдгээ илэрхийллээ.
