Давосын Дэлхийн эдийн засгийн чуулга уулзалтад оролцох үеэрээ Монгол Улсын Ерөнхийлөгч Ц.Элбэгдорж хоёр талын уулзалтуудыг амжилттай хийж байна.
Ерөнхийлөгч Ц.Элбэгдорж, уг чуулга уулзалтад оролцож буй Украин Улсын Ерөнхийлөгч В.Януковичтой уулзаж, хоёр улсын харилцаа хамтын ажиллагааг хөгжүүлэх талаар санал солилцлоо.
Тэрээр “Украин Улсад манай улсаас олон тооны оюутан залуус суралцаж, мэргэжил эзэмшиж байсан цаг саяхан. Салбар бүрт “Львовын төгсөгчид” амжилттай ажиллаж байна. Өнөөдөр Монгол-Украин хоёр улсын хооронд харилцааны шинэ хаалгыг нээхэд эдгээр төгсөгчид гүүр болох учиртай” гээд, Украин Улсад суралцаж, ажил амьдралын гараагаа тэндээс эхэлж байсан тухайгаа дурсав.
Ерөнхийлөгч В.Янукович, хоёр улсын харилцаа хамтын ажиллагааг бүх салбарт хөгжүүлэх сонирхолтой байгаагаа илэрхийлээд, Монгол Улсын Ерөнхийлөгч Ц.Элбэгдорж болон тус улстай хувь заяагаа холбосон бусад хүмүүсийн дэмжлэгтэйгээр энэ харилцаа амжилттай хөгжинө гэдэгт итгэж байгаагаа хэлэв.
Хөрөнгө оруулалтыг нэмэгдүүлэх, харилцан ашигтай ажиллах, худалдааны эргэлтийг нэмэгдүүлэх, боловсролын салбарын хамтын ажиллагааг сэргээх талаар хоёр Ерөнхийлөгч санал солилцов. Мөн олон улсын түвшинд яригдаж байгаа асуудлуудаар санал солилцлоо.
