Дэлхийн эдийн засгийн чуулга уулзалтад, улс орнуудын төр засгийн тэргүүнүүдээс гадна хэлж байгаа үг, санал нь үнэтэй байдаг “хүндэт оролцогчид” байдаг юм. Тэдний үгийг хүмүүс, сэтгүүлчид анхааралтай сонсч өөрсдийн тайлбар дүгнэлтээ өгдөг. Хөрөнгө оруулагч Жорж Сорос,” Нью-Йорк Таймс”-ын сэтгүүлч, зохиолч Томас Фрийдман, Билл Гейтс, CNN-ийн тоймч Ричард Күэст, Билл Клинтон нар бол чухам тийм оролцогчид билээ.
Монгол Улсын Ерөнхийлөгч Ц.Элбэгдорж эдгээр нэр хүндтэй хүмүүстэй Давосын эдийн засгийн чуулга уулзалтын үеэр уулзсан. Давосын 41-р уулзалтын чухал сэдэв болоод байгаа эдийн засгийн тогтвортой байдал, байгальд ээлтэй хөгжил, төр хувийн хэвшлийн түншлэл зэрэг асуудлуудаас гадна Монгол Улсын хөгжлийн бодлоготой хамаатай бусад сэдвүүдээр уулзаж санал солилцсон юм.
Монгол Улсын эртний түнш анд Ж.Сорос боловсролыг дэмжих, ардчиллыг бэхжүүлэх чиглэлээр хэрэгжүүлж байгаа төсөл хөтөлбөрүүд нь амжилттай хэрэгжиж байгаад баяртай явдагаа илэрхийлээд, цаашдаа ч энэ хамтын ажиллагаа удаан үргэлжлэх болно гэсэн юм.
Зохиолч Т.Фрийдман 2009 онд Монгол Улсын Ерөнхийлөгчтэй Нью-Иорк хотноо уулзсанаа дурсаад, тэр үед яригдаж байсан “Халуун хавтгай хавчигдмал дэлхий” номыг монголд албан ёсоор хэвлүүлэх асуудал ажил хэрэг болсонд баяртай байгаагаа хэлсэн юм. Монголын тулгар төр байгуулагдсаны 2220 жилийн ойг тохиолдуулан монголд ирэх хүсэлтэй байгаагаа тэрээр дахин илэрхийллээ.
CNN агентлагийн эдийн засгийн тоймч Ричард Күэст мөн л монголд ирэх хүсэлтэй гэдгээ хэлсэн. “Эдийн засгийн хурдтай өсөлтийн гараан дээрээ байгаа Монгол Улсын талаар тойм сурвалжлага хийхийг сонирхож байна” гэж тэрээр ярьж байлаа.
Монгол Улсын Ерөнхийлөгчтэй уулзсан дэлхийн нэр хүндтэй хүмүүс, түүний гаргасан уул уурхайн загвар гэрээтэй болох санаачилгыг эдийн засгийн чуулганы зохион байгуулагчид дэмжин, уг санаачилгыг бодит ажил хэрэг болгох ажлуудыг хэд хэдэн удаа зохион байгуулсны дүнд загвар гэрээний төсөл бэлэн болсоныг сайшааж байлаа. Мөн Давсоын чуулга уулзалтад Монгол Улсын оролцоо улам бүр идэвхжиж байгаад баяр хүргэж байсан юм.
Ийнхүү ШХУ-ны Давос хотноо Дэлхийн эдийн засгийн чуулга уулзалт амжилттай боллоо.
Монгол Улсын Ерөнхийлөгч чуулга уулзалтын үеэр уул уурхай, металлургийн бодлого, түүхийн эдийн барааны үнэ нийлүүлэлтийн тогтворжуулалт, олон улсын мөнгө валютын систем , эдийн засгийн өсөлтийн шинэ загварын асуудал, авилгын эсрэг санаачилга, байгальд ээлтэй хөгжлийн бодлогын салбар хуралдаануудад оролцож, олон улсын хамтын нийгэмлэг бүс нутгийн өмнө тулгарч буй сорилтуудыг шийдвэрлэхэд чиглэсэн зорилт, үйл ажиллагаа, санаачилгыг дэмжиж байр сууриа илэрхийллээ.
Монгол Улсын Ерөнхийлөгч Ц.Элбэгдорж 1-р сарын 31-ний өдөр эх орондоо ирэв.
