Жигмиддашийн Баярцэцэг нь МУИС-ийн Хууль зүйн сургуулийг 1998 онд дүүргэж, хуульч мэргэжил эзэмшжээ. Мөн Колумбын их сургуульд 2000-2001 онд судалгааны ажил хийж, 2008 онд Харвардын их сургуульд хуулийн магистрын зэрэг хамгаалсан байна.
Тэрээр 1997-1998 онд УИХ-ын Тамгын газарт ажилтан, 1998-2000 онд Либерал эмэгтэйчүүдийн оюуны сан төрийн бус байгууллагад төслийн ажилтан, 2001 онд Нью-Йорк хотноо НҮБ-д дадлагжигч, 2001-2010 онд Нээлттэй нийгэм хүрээлэнд засаглалын хөтөлбөрийн менежерээр ажиллаж байв. Үүний сацуу 2008 онд Вашингтон хотноо Хэрэглэгчдийн холбоонд бодлогын судлаач хийхдээ АНУ-ын конгресстэй холбоотой ажиллаж, 2009-2011 онд Америкийн өмгөөлөгчдийн холбооны (American Bar Association) Монгол дахь төлөөлөгчийн үүрэг гүйцэтгэж иржээ.
Ж.Баярцэцэг нь хүний эрхийн хуульчийн хувьд Монголд төлбөрийн чадваргүй иргэдэд үнэ төлбөргүй өмгөөллийн туслалцаа үзүүлэх төвүүдийг байгуулахад идэвхтэй оролцож, авлигын эсрэг тууштай ажилласан бөгөөд шийдвэр гаргахад иргэдийн оролцоог бий болгох, төрийн бус байгууллагуудын үүрэг, үр нөлөөг өндөржүүлэхэд онцгой анхаарч байжээ. Тиймээс ч тэрээр Хүний эрхийн Үндэсний комиссын, Мэдээллийн эрх чөлөөний, Сонирхлын зөрчлийн тухай, мөн Авлигын эсрэг зэрэг олон хуулийн төслийг боловсруулахад оролцжээ. Түүнчлэн олон улсын байгууллагуудад зөвлөгөө өгч, дэлхийн хэмжээнд явуулсан хэд хэдэн судалгааны ажилд оролцож байжээ.
