Нөхөд өө!
Эрхэм генерал, офицер, ахлагчид аа!
Хүндэт эцэг, эхчүүд ээ!
Юуны өмнө Сьерра Леон Улс дахь НҮБ-ын мандаттай энхийг дэмжих ажиллагаанд ур чадвараараа шалгаран, өөрийн хүсэл зоригоо илэрхийлэн оролцож, цэргийн дээд командпалаас даалгасан хүндтэй бөгөөд нэн хариуцлагатай үүргийг төр, ард түмэндээ өргөсөн эр цэргийн ёсоор нэр төртэй биелүүлээд ирсэн офицер, ахлагч, гэрээт цэргүүдэд Монгол Улсын Ерөнхийлөгч, зэвсэгт хүчний Ерөнхий командлагчийн хувьд гүн талархлаа илэрхийлж, чин сэтгэлийн баяр хүргэе.
Өнөөдөр Монголын ард түмэн Зэвсэгт хүчнийхээ НҮБ-ын энхийг сахиулах болон олон улсын хүмүүнлэгийн бусад ажиллагаанд оролцож байгаагийн үр шимийг зөвхөн цэрэг, батлан хамгаалах хүрээгээр хязгаарлагдахгүй гадаад харилцаа, улс төр, эдийн засаг, хүмүүнлэгийн салбарт ч хүртэх болно.
Энэ үүднээс авч үзвэл Та бүхэн цэрэг эрсийн ёсоор хилийн чанадад үүрэг гүйцэтгээд ирснээр зогсохгүй эх орныхоо хөгжил дэвшилд зохих хувь нэмрээ оруулж байна гэж ойлгох ёстой.
Цаашид Монголын төр засаг, Зэвсэгт хүчнээ улам чадваржуулж, мэргэшүүлэх, ялангуяа НҮБ-ын болон олон улсын бусад ажиллагаанд үүрэг гүйцэтгэх нөхцөл, боломжийг нэмэгдүүлэхэд улам их анхаарч шат дараалсан арга хэмжээнүүдийг авах болно.
Сьерра Леон Улсад үүрэг гүйцэтгэсэн та бүхэнд дахин талархал илэрхийлье.
Манай офицер, ахлагч нарын үүрэг гүйцэтгэсэн хугацаанд арын албаны ажил, амьдралыг найдвартай зохицуулж, сэтгэл санааны гүн дэмжлэг үзүүлж, өглөө бүхэн цайныхаа дээжийг өргөж байсан хүндэт эцэг эхчүүд, эхнэр, хүүхэд, төрөл төрөгсөд, найз нөхдүүдэд баярласнаа илэрхийлж байна.
Монгол цэргийн сүр хүч улам бадартугай !
Ура нөхөд өө!
