Монгол Улсын Ерөнхийлөгч Ц.Элбэгдорж өнөөдөр анхан, давж заалдах шатны болон захиргааны хэргийн шүүхийн Ерөнхий шүүгчид, тамгын хэлтэс, албадын дарга нарын нэгдсэн зөвлөгөөнд оролцогчидтой уулзлаа.
Ерөнхийлөгч Ц.Элбэгдорж хэлэхдээ “...Өнөөдөр бид нийгмээрээ шударга ёсны тухай ярьцгааж байна. Шударга ёс бол нийгмийн хамгийн том баялаг юм. Нийгмийн баялаг гэдэг хүн бүхэнд хамаатай, ээлтэй, хүн бүр хүртэж болдог зүйл. Шударга ёс яг үүнтэй адил хүн бүхэнд хамаатай, хүн бүр сайн үр жимсий нь хүртэх ёстой тийм зүйл учраас нийгмийн баялаг болж байгаа юм.
Шударга, ёсзүйтэй, хариуцлагатай шүүх зөвхөн хүний эрх , эрх чөлөөний баталгаа төдийгүй улс орны хөгжлийн түлхүүр юм. Шүүх бол төрийн үргэлжлэл биш, эрх мэдлийн үргэлжлэл биш шүүх бол хүний үргэлжлэл юм гэдгийг би дахин хэлэхийг хүсч байна. Шүүгч нийгмийн гэрээ болсон хуулийг баримталж шийдвэр гаргадаг. Ингэхдээ энэ шийдвэр тань эцсийн маргашгүй шийдвэр болдог гэдгийг байнга санаарай. Сайн төр, сайн нийгмийн эхлэх нь шүүх. Ийм итгэл үнэмшлийг шүүгчид та бүхэн зүрхэндээ, тархиндаа бий болгоорой.
Шүүх эрх мэдлийн шинэтгэлийг гүнзгийрүүлэх хөтөлбөрийг хэрэгжүүлэхэд шүүгчид та бүхний өөрөө өөртөө хийж чадах өөрчлөлтөөс их зүйл хамаарна. Шинэтгэлийн гол бүрэлдэхүүн хэсэг нь та өөрөө юм гэж харах хэрэгтэй.
Шүүхийн хараат бус байдлын талаар буруу ойлголт байдаг. Хаана ард түмний дэмжлэг байна, тэнд хараат бус байдал байна гэсэн үг. Шүүх шинэчлэгдэж байна гэж ард түмэн яриад эхэлсэн л бол, тэнд та бүхний хараат бус байдал хангагдаж байна гэсэн үг. Шүүх бол өөрийгөө харуулдаггүй, өрөөлд харагддаггүй “цайз” биш гэдгийг алхам тутамдаа санаж ажиллах хэрэгтэй.
Хараат бус байдлыг хангах гол хүчин зүйл бол ил тод байдал юм. Таны гаргаж байгаа үйлдэл, шийдвэрийг өөр хүн мэдэж байгаа бол та өөртөө хяналттай болно. Мэдээллийн хурд болон хамрах хүрээ асар өндөр болсон энэ цаг үед шүүгчийн шийдвэр ил тод мэдээлэгдэж байх ёстой. Шүүгчийн шийдвэр хүмүүст ил тод болсон цагт сүүдрээ нуудаггүй тогтолцоо шүүхэд бий болно. Шүүгчийн гаргасан шийдвэрийг олон түмэн мэддэг, ил тод байдаг бол таны хараат бус байх гол хүчин зүйл юм шүү...” гэлээ.
Монголын шүүгчдийн холбоо, Монголын шүүгч эмэгтэйчүүдийн холбоо, Монголын шүүхийн ажилтнуудын холбооны удирдах зөвлөлүүдийн хамтарсан хурлаас шийдвэрлэсний дагуу Монгол Улсын Ерөнхийлөгчийн “Шударга байцгаая” уриаг дэмжин монголын шүүгчид “Шударга ёсны тунхаг”-тай болжээ. Ерөнхийлөгчийг үг хэлсний дараа шүүгчид “Шударга ёсны тунхаг”-аа Монгол Улсын Ерөнхийлөгчид гардууллаа. Хуулиа баримтлан, зөвийг эрхэмлэн дээдэлж, өргөсөн тангарагтаа үнэнч байж, авлига, ашиг сонирхлын зөрчлөөс ангид байж, айлгахгүй, алагчлахгүй, найр тавихгүй, шударга бус байдалтай үл эвлэрэн мэргэжилдээ хүндэтгэлтэй хандахыг үйл ажиллагааны үндсэн зарчим, баримтлах үнэт зүйлсээ хэмээн шүүгчид тунхаглаж байна.
