Монгол Улсын Ерөнхийлөгч Ц.Элбэгдоржийн хөдөө орон нутаг дахь томилолт Өвөрхангай аймгаас эхэллээ. Ерөнхийлөгч эхлээд тус аймгийн Өлзийт сумын 1-р багийн малчин Ц.Дондовхүүгийнд зочилж, хаваржилтын байдалтай танилцлаа.
Орон нутаг нэлэнхүйдээ цас ихтэй байна. Гурав дараалж орсон цас өвдгөөр татам өндөр хунгарласан ч, малчид энэ жил тэвдэж сандраагүй, мал сүргийн хорогдолгүй байна. “Өнгөрсөн жилийн цас зуд бидэнд их сургамж үлдээсэн. Малчид энэ жил өвөлдөө сайн бэлдэж, өвс хадлангаа ч сайн базаалаа. Малын олныг биш харин чанартайг өсгөх ёстой юм байна гэдгийг малчид ойлгож эхэлсэн байна” гэж малчин Ц.Дондовхүү ярилаа.
Эднийх бог, бод нийлсэн 800 гаруй толгой малтай хаваржиж байна. Энэ жил сумын хэмжээнд малын хорогдолгүй байгаа гэж сумын Засаг дарга Ё.Рэнцэндорж хэллээ. “Өнгөрсөн жилийн зуднаар 160 мянган толгой мал 90 мянга болтлоо хорогдсон. Харин энэ жил хэдийгээр цас их орсон ч, малчид өвлийн бэлтгэл сайн хийсэн болохоор бараг малын хорогдолгүй хавартай золгож байна. Малгүй болсон нийт 53 айл өрхийг тус бүр 1 сая төгрөгөөр, НҮБ-ын төслөөр 25 өрхийг тус бүр 300 мянган төгрөгөөр малжуулаад байна” гэж тэрээр ярив.
Өлзийт сум 2700 хүн амтай. Мал цөөрч, малгүй болсон малчид ажилгүйчүүдийн эгнээг нэмэх эрсдэл байгаа ч жижиг дунд үйлдвэрийг дэмжих хөтөлбөрийн ачаар суманд ажлын байр нэмэгдэж эхэлж байна. Талх нарийн боов, гутал, оёдлын цех гээд 6 аж ахуй шинээр ажиллах болжээ.
Сумын хөгжлийг дэмжих хөрөнгө тухайн сумын хүн амаас хамаарч дунджаар нэг суманд 35-50 сая төгрөг оногдож байгаа. Энэ мөнгөөр хамтарч бүлэг болж, хоршооллын хэлбэрээр ажиллаж байгаа иргэдийг дэмжих бодлого баримталж байгаа гэж Өвөрхангай аймгийн Засаг дарга Д.Тогтохсүрэн энэ үеэр танилцууллаа. “Хуримтлалын бүлэг, хоршоо хэлбэрээр ажиллаж байгаа хүмүүс илүү хариуцлагатай, хяналттай байдаг учраас мөнгөний зарцуулалт үр дүнтэй байна гэдэгт бид итгэлтэй байгаа” гэж тэрээр хэлэв.
УИХ-ын дэд дарга Г.Батхүү энэ үеэр мөн Өвөрхангай аймгийн сумдад дундын өмчлөлийн техникийн цех байгуулахад дэмжлэг үзүүлж эхэлсэн тухай ярьж байлаа. Малчид хамтын хөдөлмөрөөрөө газар тариалан эрхэлж, өвс хадлангаа бэлдэхэд трактор болон бусад шаардлагатай техникээс бүрдсэн дундын өмчлөлийн техникийн цех үр дүнгээ өгөх юм байна.
“Малчид өнгөрсөн цаг үеэсээ сургамж авч, малын чанараа сайжруулж, өвөлд сайн бэлдсэн нь сайшаалтай. Засгийн газраас малчдыг, жижиг дунд аж ахуй эрхлэгчдийг, сумын хөгжлийг дэмжих хөтөлбөр хангалттай олон хэрэгжүүлж байна. Эдгээр хөтөлбөр хариуцлагатай, үр дүнтэй байх хэрэгтэй” гэж Ерөнхийлөгч хэллээ.
2-р сарын 17-ны пүрэв гарагийн үдээс хойш Ерөнхийлөгч Ц.Элбэгдорж дагалдан яваа хүмүүсийн хамт Өвөрхангай аймгийн төв Арвайхээр хотод хүрэлцэн ирэв.
Монгол Улсын Ерөнхийлөгч, Зэвсэгт хүчний Ерөнхий командлагчийг Зэвсэгт хүчний 256-р ангийн цэргийн хүрээний хүндэт харуул жагсаж, хүндэтгэн угтаж авлаа.
