Өнөөдөр өглөө Монгол Улсын Ерөнхийлөгч Ц.Элбэгдорж өглөөний цайндаа Спортын алдартнууд, үе үеийн олимпийн медальтнууд болон биеийн тамир, спортын салбарын холбоодын тэргүүд, эрдэмтэдийг урилаа. Уригдсан зочдоос 2008 оны олимпийн аварга Э.Бадар-Ууган, Д.Баатаржав нар болоод олимпийн мөнгөн медальт Ж.Мөнхбат, З.Ойдов, Олимпийн хүрэл медальт Ч.Дамдиншарав, Х.Даваадалай, Н.Энхбат, Н.Баярсайхан, М.Нармандах, Д.Сэрээтэр, МУОХ-ны Ерөнхийлөгч Д.Загдсүрэн, МОБ-ын холбооны Ерөнхийлөгч Д.Цогбаатар нарын зэрэг олон зочид хүрэлцэн ирсэн байв.
Уулзалтанд оролцсон спортынхон салбарынхаа өмнө тулгамдаж буй олон чухал асуудлаар Ерөнхийлөгчтэй санал бодлоо хуваалцаж танилцуулга хийсэн юм. Монгол хүний бие физиологийн чанар чансаа улам муудаж байгаа энэ үед нийтийн биеийн тамир, спортыг олон нийтэд улам хүртээмжтэйгээр зохион байгуулах нь хамгийн чухал гэдгийг өглөөний цайнд уригдсан зочид нэгэн дуугаар дэмжиж байлаа.
Мөн их дээд болон дунд сургуулиудын спортын талбай барилгажиж байгаа, спортын зүтгэлтнүүдийн нийгмийн халамжийн асуудал хангалтгүй байгаа, олимп, тив дэлхийн хэмжээний тамирчдыг бэлтгэхэд шинжлэх ухаанч судалгаа шинжилгээ, бэлтгэл сургуулилалт түлхүү ашиглах тухай мөн нас насныханд зориулсан спортоор хичээллэх гарын авлага боловсруулж бүх нийтээр сурталчилж, төрөөс зохих орчин бүрдүүлж ажиллах тухай гээд олон чухал асуудлыг энэ уулзалтын үеэр хөндсөн юм.
Ерөнхийлөгчийн өглөөний цайнд уригдсан Монгол Улсын Дархан аварга Ж.Мөнхбат спортынхны цол зэргийн талаар өөрийн байр суурийг илэрхийлэхдээ: “Спортын салбарт олон жил ажилласан хүмүүст “Ардын багш” гэдэг цол өгч байгаа, үүнийг “Ардын тамирчин” гэж өөрчлөх нь зүйтэй” гэсэн санал дэвшүүлсэн бол, Олимпийн мөнгөн медаль З.Ойдов: “Эрэгтэй эмэгтэй хамааралгүй бүх насныхан цэргийн алба хааж баймаар байна, ингэж бид Монгол хүний бие бялдрыг улам чадавхитай болгох болно” хэмээн өвөрмөц агаад сонирхолтой саналуудыг дэвшүүлж байлаа.
Дараа нь Монгол Улсын Ерөнхийлөгч Ц.Элбэгдорж үг хэлсэн. “Миний голлон баримтлах бодлого бол Монгол хүний Эрүүл мэнд, боловсролын асуудал. Тэр дундаа Эрүүл мэндийн салбар дотроо бүх нийтийн биеийн тамирын асуудал хамгийн чухал сэдэв. Хүний эрүүл саруул явахад эм эмнэлэгийн дэмжлэг 10 хувьтай байдаг бол спортын эзлэх хувь хэмжээ бараг 70-80 хувьтай байдаг гэсэн тооцоо бий.
Монголчууд цөөхүүлээ. Ийм цөөхөн хүнтэй ард түмний нэг хүн бүр 2-3 хэлээр ярьж, 2-3 спортоор хичээллэж байж бид эрүүл чийрэг, дэлхийд өрсөлдөхүйц үндэстнийг бүтээх болно. Бид хамгийн түрүүнд хот суурийн газрын иргэдийн хөдөлгөөний дутагдал, залхуурлын асуудлаас гарах хэрэгтэй. Үүний тулд хүнээ хөгжүүлэх нь чухал юм. Хувь хүний хөгжил 100 хувь төрөөс хамааралтай биш, хувь хүнээс, өөрөөс нь гэр бүлээс нь шалтгаалдаг. Түүнд төрийн зөв дэмжлэг хэрэгтэй.
Нийгэмд улс төрчид спортыг сурталчилахаас илүүтэй спортынхны зүгээс нийгмийн зүтгэлтний оролцоо буюу та бүхний дэмжлэг хамгийн чухал юм. Өнөөдөр Монголд бараг айл бүрээс бөө “төрдөг” боллоо. Уг нь айл бүрд спортын тамирчин төрөх хэрэгтэй байна. Мухар сүсгээр асуудлыг шийдэхээсээ илүүтэй, биеийн тамираар асуудлаа шийдэх нь зөв юм” гэж онцолсон юм.
Ерөнхийлөгч Ц.Элбэгдорж, 1998 онд Ерөнхий сайд болонгуутаа дунд сургуулийн биеийн тамирын талбайг барилга, орон сууцны зориулалтаар ашиглахыг хориглох тухай асуудал тавьж байсан. Өнөөдөр ч энэ асуудал дээр анхаарч ажиллахын зэрэгцээ, аймаг бүрт, дүүрэг бүрт, хороо бүрт, сум бүрт нийтийн биеийн тамирын цогцолбор байгуулж ажиллахыг дэмжих болно гэдгээ илэрхийлэв.
