Баянхонгорчууд хөдөлмөрлөж, хичээж, чармайж, орлого нь нэмэгдэж, аймагт бүтээн байгуулалт хийгдэж, ажлын байр шинээр бий болж байгаа тухай баянхонгорчууд Ерөнхийлөгчид ярилаа.
Ажилгүйдлийн түвшин өнгөрсөн оныхтой харьцуулахад 1.6 хувиар буурч, сум бүрт 20 хүнийг, Баянхонгор суманд 70 хүнийг ажлын байраар хангах гэрээг Засаг дарга нартай хийж тэр нь амжилттай хэрэгжиж байна. Жижиг дунд үйлдвэрийг дэмжих санд 150 гаруй хүнийг хамруулж, 600 гаруй иргэний орлогыг нэмэгдүүлжээ. Өнгөрсөн жил Хөдөлмөр эрхлэлтийг дэмжих сангийн хүрээнд 873 сая төгрөгийн төсөл хэрэгжсэн. Энэ онд тэрбум 500 сая төгрөг болж нэмэгджээ. Өөрөөр хэлбэл, хөдөлмөр эрхлэлтийн талаар төрөөс явуулж байгаа бодлого хэрэгжих эдийн засгийн суурь тавигджээ. Иргэд ч үүнийг ойлгож мэргэжилтэй болохыг хүсч, аймгийн мэргэжлийн боловсролын сургалтын төвд суралцагчдын тоо нэмэгдэж, ажлын байрны эрэлттэй байна.
Аймгийн төвд баруун бүсийн худалдааны төв шинээр баригдсан нь аймгийн хөгжил, иргэдийн амьжиргаанд ихээхэн дэмжлэг болсон байна.
Баянхонгорчууд аймаг нь хөгжиж урагшилж буйд баяртай байгаагаа Ерөнхийлөгчид хэлж байлаа. “Ажил хийсэн хүн ам тосдоно гэдэг. Манай баянхонгорчууд хөдөлмөрлөж, орлого нэмэгдэж , хийх санаачилга нэмэгдэж байна. Нутгийн унаган иргэд, бизнесменүүд ч биднийг дэмжиж байна” хэмээн иргэд яриагаа эхэллээ.
Уул уурхайн том төслүүдэд ажиллах иргэдийг орон нутгуудаас сонгох, оюутнуудад өгч байгаа мөнгийг сургуульд нь биш оюутны гар дээр өгөх, нүүдлийн номын санг орон нутагт ажиллуулахад дэмжлэг үзүүлэх, уул уурхайтай холбоотой асуудлыг шийдэхэд орон нутгийн иргэдийн оролцоог хангах, тэдний саналыг тусгадаг байх, тендерийн хуулийг өөрчлөх, сонгуулийн хуулийг өөрчлөх зэрэг олон асуудлаар иргэд саналаа хэлэв.
Уулзалт бүр дээр иргэдийн зүгээс бэлэн мөнгөний олголт, уул уурхайн ашиг орлогыг иргэддээ хүртээмжтэй үр дүнтэй тараахтай холбоотой төрөл бүрийн санал гарч байсан.
Ерөнхийлөгч цаашдаа бэлэн мөнгөний амлалт зогсох нь ойлгомжтой гээд нэгэнт засгаас олгож байгаа, авах ёстой юмаа авч байгаа, гагцхүү тэр мөнгийг хэрхэн үр дүнтэй , үлдэцтэй зарцуулах талаар иргэд өөрсдөө санаачилгатай ажиллах ёстой гэлээ. “ 21 мянган төгрөгөөрөө олуулаа нийлээд юу хийж болох талаар тооцоо хийснээ нэгэн малчин надад үзүүлсэн. 40 малчин нийлж нэг жилийн мөнгөө цуглуулж байгаад 10 сая төгрөгийн жижиг үйлдвэр барих болсон байна. Хоршиж, хамтарч хөрөнгө мөнгөө нийлүүлж жижиг үйлдвэрлэл эрхлэх боломжтой” гэв.
Ерөнхийлөгч өнгөрсөн жил ашигт малтмалын лиценз олголтыг түр хугацаагаар зогсоох шийдвэр гаргаж , лицензийн асуудал цэгцэрсэнд иргэд талархаж байгаагаа илэрхийлж байлаа. Цаашдаа ашигт малтмалын хуулинд өөрчлөлт оруулахаар ажиллаж байгаа, ер нь аливаа ашигт малтмалтай холбоотой асуудалд орон нутгийн иргэдийн оролцоо байх, лиценз олголтыг аль нэг агентлаг биш Засгийн газар хуралдаад шийддэг байх хэрэгтэй гэдэг саналаа Ерөнхийлөгч хэллээ.
Алдарт эхийн одонгийн хууль батлагдаж, 4 хүүхэдтэй эх одон авдаг болж байгаа нь өрх гэрийн хувьд дэмжлэг болох төдийгүй хүн амын өсөлтийн бодлогыг дэмжсэн зөв шийдвэр болсон гэдэг үгийг ч мөн олон иргэд хэлж байсан.
Хөдөөгийн иргэдийн санааг зовоож байгаа бусад асуудалд Ерөнхийлөгчийг дагалдан ажиллаж байгаа сайд, гишүүд , зарим агентлагийн дарга нар хариулт өглөө. Ерөнхийлөгчийн орон нутаг дахь томилолтын үеэр танилцсан ажлууд, уулзалтаар яригдсан асуудлуудын дагуу хэрэгжүүлэх ажлын жагсаалт гарч, Засгийн газарт үүрэг чиглэл өгдөг. Өнгөрсөн жил баруун аймгуудад ажилласны мөрөөр хийж хэрэгжүүлэхээр төлөвлөсөнн ажил 80 хувийн биелэлттэй, үлдсэн ажлууд энэ жил хэрэгжихээр төсөвт туссан байгаа юм.
