Тайландын Вант Улсын Эрхэмсэг Гүнж Маха Чакри Сириндхорн Монгол Улсын Ерөнхийлөгчийн урилгаар айлчилж байна. Эрхэмсэг Гүнжийг Монгол Улсын Ерөнхийлөгч Ц.Элбэгдорж хүлээн авч уулзлаа.
Эрхэмсэг Гүнжийн 1992 онд хийж байсан анхны айлчлал 2 орны харилцааны түүхэнд шинэ хуудас нээж, Монголын ард түмэн Тайландын ард түмэнтэй илүү ойр дотно танилцах боломжийг олгож байсан бөгөөд энэ удаагийн айлчлал манай 2 орны хооронд дипломат харилцаа тогтоосны 35 жилийн ойтой тохиож байгаа нь бэлэгшээлтэй гэдгийг Ерөнхийлөгч Ц.Элбэгдорж ярианыхаа эхэнд дурдлаа.
Анхны айчлалынхаа дараа Эрхэмсэг Гүнж Маха Чакри Сириндхорн “Айраг гэж юу вэ” аян замын тэмдэглэл ном бичиж байсан нь, нүүдэлчин соёл иргэншлийг тайландын ард түмэнд таниулахад үнэтэй хувь нэмэр болж байсан юм. Энэ удаад Эрхэмсэг Гүнж Төв, Хөвсгөл аймгуудад зочилох бөгөөд, байгаль орчны салбарын томоохон мэргэжилтний хувьд энэ нь манай хоёр орны хамтарсан судалгаа шинжилгээ эхлүүлэх томоохон боломж байж болохыг Ерөнхийлөгч хэллээ. Эрхэмсэг Гүнжийн ивээл дор Төв аймагт үлгэр жишээ “Үдийн хоол” хөтөлбөр хэрэгжүүлэхээр ажиллаж байгаа бөгөөд, энэ хөтөлбөр хүүхдэд хөдөлмөрийн дадал суулгах, орон нутгийн нөөц боломжийг дайчлах сайхан үлгэр жишээ юм гэдгийг Ерөнхийлөгч Ц.Элбэгдорж онцоллоо.
Монгол Улс гадаад бодлогынхоо үзэл баримтлалд АСЕАН-ы гишүүн орнуудаас Тайланд Улсыг тусгайлан нэр заан оруулж, харилцаа хамтын ажиллагаанд өндөр ач холбогдол өгч байдгийг Ерөнхийлөгч хэлээд, Тайландын Цог Жавхлант Ван Пумибол Адулъяадет болон Эрхэмсэг Хатан Сирикат нарт Монголын ард түмний өмнөөс болон хувиасаа хүндэтгэл илэрхийлж, урт удаан наслахын өлзийтэй ерөөлийг дэвшүүлж байгаагаа уламжиллаа.
Эрхэмсэг Гүнж Маха Чакри Сириндхорн, энэ удаад Монголын нүүдэлчин ахуй соёл, зан заншилтэй улам гүнзгий ойртон танилцах боломж олдож байгаад баяртай байгаагаа хэлээд, “ Үдийн хоол” хөтөлбөрийн хүрээнд 2 талын ажлын хэсэг харилцан зочилж, тайландын талаас хүнсний ногооны үр нийлүүлсэн тухай ярилаа.
Монгол Тайландын уламжлалт найрсаг харилцаа, хамтын ажиллагаа ялангуяа Монгол Улс ардчилал, зэх зээлийн эдийн засагт шилжсэнээс хойшхи он жилүүдэд идэвхжиж, өндөр дээд хэмжээний айлчлалыг хоёр талдаа хэрэгжүүлж ирсэн билээ.
