Монгол Улсын Ерөнхийлөгч Ц.Элбэгдоржид БНХАУ-аас Монгол Улсад суух Онц бөгөөд Бүрэн эрхт Элчин сайд Ван Сяолун итгэмжлэх жуух бичгээ өнөөдөр өргөн барив. Ерөнхийлөгч Ц.Элбэгдорж Ван Сяолунд элчин сайдаар томилогдон ирсэнд баяр хүргээд “Монгол Улс, БНХАУ-ын харилцааг шинэ зуунд, шинэ агуулгаар баяжуулан хөгжүүлэх хариуцлагатай үед та элчин сайдаар ирлээ. Энэ нь том хувь заяа, бас том хариуцлага.
Таны ажиллах хугацаанд хоёр орны хооронд дээд, өндөр хэмжээний харилцан айлчлал, уулзалтын давтамж хадаглагдаж, бүх салбарт харилцаа, хамтын ажиллагаа улам идэвхтэй хөгжинө гэж итгэж байна. Өнгөрсөн жил БНХАУ-д төрийн айлчлал хийхдээ Хятад улсын дарга эрхэмсэг ноён Ху Жинтаотай уулзаж, хоёр талын харилцаа, хамтын ажиллагааны өргөн хүрээтэй асуудлаар ярилцсан. Тухайлбал худалдаа, эдийн засаг, түүний дотор уул уурхай, эрчим хүч, дэд бүтэц, байгаль орчныг хамгаалах, хүмүүнлэгийн чиглэлээр хамтын ажиллагааг эрчимтэй хөгжүүлэх талаар ярилцсан юм. Дээд хэмжээний энэ уулзалтаар тохиролцсон зүйлийг хэрэгжүүлэх талаар элчин сайд та манай холбогдох байгууллагуудтай хамтарч ажиллана гэж бодож байна. Хоёр тал стратегийн түншлэлийг тодорхой агуулгаар тохиролцож, ойрын хугацаанд дээд хэмжээний уулзалтаар зарлан тунхаглах боломж байна. Стратегийн түншлэл тогтоох нь хоёр тал харилцаа, хамтын ажиллагаандаа өндөр ач холбогдол өгч буйн илэрхийлэл, мөн урт хугацаанд тогтвортой урагшлуулан хөгжүүлэх эрмэлзэл дүүрэн буйн нотолгоо гэж бодож байна.
Хоёр орны худалдаа, эдийн засгийн хамтын ажиллагаа эрчимтэй хөгжиж байна. Надад байгаа статистик мэдээллээр хоёр орны худалдаа 3,3 тэрбум ам долларт хүрчээ. Цаашдаа ч нэмэгдэнэ гэдэгт итгэлтэй байна. Олон улсын болон бүс нутгийн зангилаа асуудлаар хоёр тал ижил буюу төстэй байр баримталдаг нь энэ чиглэлээр хамтран ажиллах сайхан боломж олгож буйг тэмдэглэмээр байна. Элчин сайд таныг итгэмжлэх жуухаа барьж буй энэ үетэй БНХАУ-ын Гадаад хэргийн сайдын айлчлал давхцаж байгаа нь бэлгэ дэмбэрэлтэй юм. Сайд харилцаа, хамтын ажиллагааг улам илүү агуулгаар баяжуулахаар харилцан ярилцахаар ирж буй гэдэгт итгэж байна” гэж хэллээ.
Элчин сайд Ван Сяолун БНХАУ-ын дарга Ху Жинтаогийн мэндчилгээг дамжуулаад хоёр орны харилцаа, хамтын ажиллагааг хөгжүүлэхэд хувь нэмэр оруулахаа илэрхийлэв.
Ван Сяолун нь 1965 онд Хэбэй мужид төрсөн, эдийн засгийн ухааны доктор хүн юм. Тэрээр 1987-1988 онд БНХАУ-ын ГХЯ-ны орчуулгын танхимын ажилтан, 1989-1992 онд Олон улсын газрын ажилтан атташе, 1992-1995 онд НҮБ дахь Суурин Төлөөлөгчийн газрын атташе, гуравдугаар нарийн бичгийн дарга, 1995-2000 онд ГХЯ-ны Олон улсын газрын гуравдугаар нарийн бичгийн дарга, тасгийн орлогч дарга, тасгийн дарга, 2000-2007 онд Олон улсын газрын зөвлөх, дэд дарга, 2007-2008 онд Хэбэй мужийн Цанжоу хотын дэд дарга, 2008 оноос Бүгд Найрамдах Сингапур Улс дахь БНХАУ-ын ЭСЯ-ны Элчин зөвлөхөөр ажиллаж байжээ.
