Монгол Улсын Ерөнхийлөгчийн дэргэдэх Түлш эрчим хүчний дэд зөвлөл Улаанбаатарын агаарын бохирдлыг бууруулах талаар цаашид авах арга хэмжээний тухай нээлттэй сонсгол “Иргэний танхим”-д зохион байгууллаа.
Улаанбаатар хотын агаарын бохирдлыг бууруулах талаар цаашид авах арга хэмжээг нийслэлийн Засаг даргын орлогч Д.Ганболд, Гэр хорооллын хэрэглэгчдийн халаалтыг цахилгаанаар хангахад шаардагдах хүчин чадлын тооцоог ЭХДҮТ-ийн ерөнхий диспетчер Ч.Жамбалсүрэн, агаарын бохирдлыг бууруулахад УБЦТС ХК-ийн оролцоог тус компанийн дэд захирал Ч.Өнөрцэцэг, нүүрсний хийн үйлдвэр төслийг MCS интернэйшнл ХХК-ийн ...Т.Мөнхтөр, газрын гүний дулааны шахуурга бүхий халаалтын системийн үр дүнг “Степпесолар” ХХК –ийн менежер Х.Мянганцоож нар танилцуулан, хүмүүсийн сонирхсон асуултад хариулав.
УИХ-аас байгуулсан ажлын хэсгийн судалгаагаар хязгаарлалтын бүсэд 6000 айл өрхийг эхний ээлжинд цахилгааны хөнгөлөлтөд хамруулах боломжтой гэсэн тооцоо гарчээ. Гэхдээ 2013 оноос цахилгаанаар эдгээр айлын халаалтыг хангахад бэрхшээл гарах төлөвтэй юм байна. Тиймээс тав, зургадугаар цахилгаан станцын асуудлыг яаравчлах хэрэгтэй байгааг хүмүүс дурдан ярив. Нийслэлийн Засаг даргын тамгын газар хязгаарлалтын бүсийг 2-3 хувилбараар гаргаад байгаа аж. Ирэх долоо хоногоос хязгаалалтын бүсийн асуудлыг шийдэх, агаарын бохирдлыг бууруулахтай холбоотой хийх ажлаа эрэмбэлэхээр зэхэж буй юм байна.
Харин тэдний мэдээллээр бол коксжсон түлш бэлтгэх үйлдвэрүүд бүрэн хүчин чадлаараа ажиллаж эхэлбэл энэ ондоо гэхэд л хотын гэр хорооллын хэрэгцээний багагүй хэсгийг хангах боломж бүрдэх тооцоо харагдаж байна. Зарим хүмүүс “Нийслэлийн агаарын бохирдлыг бууруулах тухай хуулийн хэрэгжилтийг шуурхайлах хэрэгтэй. Энэ бол иргэдийн эрүүл мэндтэй шууд холбоотой нэн чухал хууль. Ирэх гуравдугаар сараас есдүгээр сар хүртэл юу хийхээ тогтоож, хэдий хэмжээний мөнгө хөрөнгө хэрэгтэйг нэн яаралтай тооцон төсвийн тодотголоор шийдүүлэх нь зүйтэй. Гэр, байшингийн дулаалгын, зуухны стандартуудыг гуравдугаар сард багтаан тогтоож батлуулах шаардлагатай байна” хэмээн анхааруулж байлаа.
