Эрхэм нөхөд өө,
Та бүхэнд Монгол Улсад улс төрийн нам үүсэн байгуулагдсаны болон Монголын улс төрийн ууган хүчин-Монгол Ардын Нам байгуулагдсаны 90 жилийн ойн баярын мэндийг дэвшүүлье.
Одоогоос 90 жилийн тэртээд Монголын ард түмэн улс орныхоо туурга тусгаар байдлыг сэргээн батжуулахын төлөө тэмцэлд эрслэн босч, Монгол орны сэргэн мандлын нэгэн шинэ үеийг нээсэн билээ. Энэ тэмцлийн манлайд тухайн үеийн монголын сор болсон гарамгай эх оронч ноёд, лам, түшмэд, сэхээтнүүдийг эгнээндээ нэгтгэн үүссэн Монгол Ардын Нам явсан юм. Монголын ард түмний олон жилийн хүсэл мөрөөдөл болж байсан эрх чөлөө, тусгаар тогтнолыг эргүүлэн авчирсан 1921 оны ардын хувьсгал нь 1911 оны үндэсний эрх чөлөөний хувьсгалын шууд үргэлжлэл байлаа. Хорьдугаар зууны эхэн үеийн буурай монгол орныг туурга тусгаар, бүрэн эрхт улс хэвээр хадгалан, нийгэм, эдийн засаг, соёл иргэншлийн хүрээнд томоохон өөрчлөлт, дэвшлийг хийхэд өдгөөгийн Монгол Ардын Нам түүхэн үүрэг гүйцэтгэсэн. Энэ хөгжил дэвшил амар хялбар олдоогүй. ХХ зуунд Монгол орон коммунист нийгмийн туршилт, ангийн тэмцэл, хэлмэгдүүлэлт, дэлхийн дайн самуун, хүйтэн дайн гэсэн олон сорилт, бэрхшээлтэй тулгарсан бөгөөд өнгөрсөн зууны Монголын түүхийн бүх л алдаа, оноо Монгол Ардын Намтай шууд холбоотой юм.
1990 оны ардчилсан хувьсгалаар бид Монгол орныхоо тусгаар тогтнол, бүрэн эрхт байдлыг жинхэнэ утгаар нь баталгаажуулж, ардчилал, хүний эрх, эрх чөлөөг дээдэлсэн хүмүүнлэг ардчилсан нийгмийг тунхаглан ардчилсан Үндсэн хуулиа баталсан билээ.
Ардчилсан хувьсгал, өөрчлөлтийн давалгаанаар Монголд Улсад олон нам шинээр төрөн мэндэлж, улс орныхоо хөгжил, цэцэглэлийн төлөө оюун ухаан, хүч зүтгэлээ уралдуулж байна.
Монгол оронд ардчилсан төрийн тогтолцоо бэхжиж чанаржихын хэрээр улс төрийн намуудын нийгэмд гүйцэтгэх үүрэг, хүлээх хариуцлага өндөрсөж байгааг онцлон тэмдэглэхийг хүсч байна.
Манай улс төрийн намууд, юуны түрүүнд Монгол Улсынхаа үндэсний тусгаар тогтнол, аюулгүй байдал, эв нэгдэл, ардчилал, хүний эрх, эрх чөлөөний үнэт зүйлсээ дээдлэн, шударга ёсыг эрхэмлэж ажиллах учиртай.
Төрийн хэрэгт ард иргэдийнхээ шууд оролцоог нэмэгдүүлэх, орон нутгийн бие даасан эрх мэдлийг өргөжүүлэх замаар нийгэмд шударга ёс, ардчиллыг улам гүнзгийрүүлж, төрийн ажил, үйлчилгээг хөнгөн шуурхай, тэгш хүртээмжтэй, ил тод болгох шаардлагатай байна. Төрийн албыг улс төрийн нөлөөллөөс ангид байлгаж улс орныхоо өмнө тулгамдсан асуудлыг цаг алдалгүй, үр дүнтэй шийдвэрлэх төрийн чадавхийг бэхжүүлэх нь зүйтэй.
Эрдэм боловсролтой, өмч хөрөнгөтэй, эрх чөлөөтэй монгол хүнийг бүх талаар төлөвшүүлж, эх орныхоо эзэн,нийгмийн баялгийг гардан бүтээгч болгох ариун эрхэм зорилтын төлөө манай улс төрийн намууд өөрсдийн бодлого, үйл ажиллагааны өөрчлөлт, шинэчлэлийг хийж чадна гэдэгт итгэж байна.
Та бүхэнд амжилт хүсье. Сайн үйлс дэлгэртүгэй.
МОНГОЛ УЛСЫН ЦАХИАГИЙН
ЕРӨНХИЙЛӨГЧ ЭЛБЭГДОРЖ
2011 оны З дугаар сарын 01. Улаанбаатар хот
