АНУ-д “Иргэний танхим”-ын салбар байгуулагдлаа
Өнгөрөгч ням гаригт АНУ-ын нийслэл Вашингтон хотноо тус улсад сурч, ажиллаж, амьдарч буй Монгол иргэд болон үйл ажиллагаа явуулж буй олон нийтийн байгууллагуудын санаачилгаар “Иргэний танхим”-ын салбар байгуулагдлаа.
2009 оны 12 дугаар сарын 15-нд Монгол Улсын Ерөнхийлөгч Цахиагийн Элбэгдоржийн санаачилгаар байгуулагдсан “Иргэний танхим”-ын салбар одоогоор хэд хэдэн аймаг, дүүрэгт байгуулагдаж, үйл ажиллагаагаа эхлээд байгаа юм.
Өнгөрсөн жил гаруйн хугацаанд Ерөнхийлөгчийн дэргэдэх “Иргэний танхим”-д 20 гаруй нээлттэй хэлэлцүүлэг, 60 орчим салбар хуралдаан зохион байгуулагдаж 4000 гаруй иргэд санал бодлоо илэрхийлсэн байна.
Чухамхүү олон нийтийн эрх ашгийг хөндсөн аливаа асуудлаар шийдвэр гаргах, төрийн бодлого боловсруулах, хууль тогтоох явцад иргэн бүрийн оролцоог бий болгох, улмаар иргэн төвтэй төрийн тогтолцоонд шилжих, нийгмийн хариуцлага, хяналт, ил тод, нээлттэй байдлыг хангах үндсэн зорилготой иргэний танхимын үйл ажиллагаа ийнхүү хилийн чанадад, анх удаа ардчиллын өлгий АНУ-д байгуулагдлаа.
Иргэний танхимын салбар байгуулсан тус арга хэмжээний үеэр Монгол Улсын Ерөнхийлөгчийн зөвлөх А.Ганбаатар “Монгол Улсын Ерөнхийлөгчийн бодлого, үйл ажиллагаа” сэдвээр илтгэл тавьж, ЕТГ-ын Олон нийттэй харилцах, мэдээлэл боловсруулах албаны дарга С.Эрдэнэболд Иргэний танхимын талаар дэлгэрэнгүй мэдээлэл хийсэн юм.
АНУ дахь Монголчуудын санаачилгаар байгуулагдсан “Иргэний танхим” анхны хуралдаанаараа тус улсад аж төрөн суугаа монголчуудынхаа санал санаачилгыг хэрхэн төрийн бодлого боловсруулагчдад хүргэж байх тухай хэлэлцүүлэг өрнүүлэв. Мөн гадаадад аж төрж буй Монгол иргэдийн сонгуульд санал өгөх эрхийн асуудлаар нухацтай хэлэлцүүлэг өрнүүлэх тухай ч дурьдаж байлаа.
Тус хуралдаанаар “Иргэний танхим”-ын салбарыг Монголчууд төвлөрсөн Америкийн Нэгдсэн Улсын мужууд болон хилийн чанад дахь бусад улсад байгуулахыг уриалав.
АНУ-д байгуулагдсан “Иргэний танхим” ажлын албандаа орж ажиллах хүсэлтэй сайн дурын иргэдийг бүртгэж эхэлсэн бөгөөд тус улс дахь Монгол Соёлын төв, Вашингтон хот орчмын Монголчуудын холбоо, АНУ дахь Монгол залуу мэргэжилтнүүдийн холбоо, “Даяар Монгол” сэтгүүл, orloo.com, medeelel.com зэрэг мэдээллийн сайт, “Америкийн өнгө” нэвтрүүлэг, U Mon TV зэрэг байгууллага шинээр байгуулагдсан Иргэний танхимын үйл ажиллагааг идэвхитэй дэмжиж цаашид хамтран ажиллахаа мэдэгдсэн билээ.
АНУ-д “Иргэний танхим”-ын салбар байгуулагдлаа
