МЭНДЧИЛГЭЭ
Монголын сэтгүүлчдийн байгууллагын 60 жилийн ойд
Монгол түмний хөдөлмөр тэмцлийн түүхийг баринтаглан бичигч, эх орон, эгэл түмнээ гэрэлт амьдрал, гэгээн ирээдүй өөд уриалан дуудагч, ухуулан сэнхрүүлэгч, хөтлөн хошуучлагч сэтгүүлчдийн арми, тэднийг эгнээндээ нэгтгэсэн Монголын сэтгүүлчдийн байгууллагын түүхт 60 жилийн ойг тохиолдуулан Та бүхэнд чин сэтгэлийн халуун баяр хүргэн мэндчилж байна.
Харанхуйгаас гэгээ гэрэл рүү, хоцрогдлоос хөгжил дэвшил рүү замнасан монгол түмний их нүүдлийн замын эхэнд сэтгүүлчид үгэн шилбүүртэй, үзгэн унаатай мордож, угтах замыг нь гэрэлтүүлэн, урьдах саадыг анхааруулан мэдээлж, төвөг бэрхшээлээс сэрэмжлүүлэн ухааруулж явсаар нэгэн жарныг үдэж байна.
Монголын сэтгүүлчид, тэдний өргөө тоонот болсон Монголын сэтгүүлчдийн байгууллагын түүх бол монголчуудын эрт, эдүгээгийн бахархалт амьдрал, баатарлаг тэмцэл, бахдам хөдөлмөр, гайхам соёлын арилж баларшгүй алтан үсгийн бичээс билээ. Монголчууд бичгийн мэргэдээ эрхэмлэн дээдэлж, хоймор шүтээндээ залан хүндэтгэж ирсэн сайхан уламжлалтай. Бидний өвөг дээдэс, ахмад үеийнхэн энэ хүндэтгэлийг дааж, итгэлд нь багтаж чадаж байсан. Тэдний залгамж халаа болсон сэтгүүлчид та бид ч эгэл түмнийхээ итгэлт зардас, үнэнч нөхөр нь хэзээ ямагт байх учиртай.
Хүн төрөлхтний нийтлэг хөгжлийн замд хөл нийлсэн улс орныхоо сэргэн мандлын сайн цагийн түүхийг туурвих онцгой завшаан монголын сэтгүүлчдэд оногджээ. Тиймээс хүний эрх, эрх чөлөөг дээдэлсэн хүнлэг энэрэнгүй шинэ нийгмийг цогцлоон босгох эрхэм үйлсэд та бүхний оруулах хувь нэмэр, үүрэх үүрэг, хариуцлага нэн их юм.
Ардчиллын үндсэн зарчимд суурилсан Монголын сэтгүүл зүй хариуцлагатай, ёс зүйтэй байж гэмээнэ энэ ачааг дааж, үүрэг хариуцлагадаа эзэн болж чадна. Өргөн дэлгэр мэдлэг, өндөр хариуцлага, нийгэм, цаг үеэ чагнаж, сонсож чадах торгон мэдрэмж, зөвхөн үнэнийг эрхэмлэх шударга ёс зүй та бүхний унаа хөлөг, уриа дуудлага байх ёстой бөгөөд монголын сэтгүүлчид энэ зарчимд чин үнэнч байж чадна гэдэгт би огтхон ч эргэлзэхгүй байна. Монголын сэтгүүлчдийг сайн дурынх нь үндсэн дээр эгнээндээ эвлэлдүүлэн нэгтгэсэн МСНЭ өөрийн эх оронд чөлөөт ардчилсан хэвлэл мэдээллийг бүрэлдүүлэн төлөвшүүлэхэд чухал үүрэг гүйцэтгэж байгаа, цаашид ч гүйцэтгэх болно гэдэгт бас гүн итгэлтэй байна.
Монгол эх орныхоо хөгжил бадрал, монголчуудын сайн сайхан амьдралын төлөө үгийн шударга, үзгийн хурцыг зориулж яваа та бүхний ариун гэгээн үйлсэд амжилт бүтээлийг хүсэн ерөөе.
Монголд үнэнийн дуу хоолой улам улам хүчтэй цуурайтаж, шударга ёс мандан бадрах болтугай!
МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ
2011 оны 3 дугаар сарын 4
МЭНДЧИЛГЭЭ
