Тендерийн хуулийг өөрчлөх хэрэгтэйг бодит байдал харуулж байна
Монгол Улсын Ерөнхийлөгч Ц.ЭЛБЭГДОРЖ Дорнод аймагт ажиллах үеэрээ тус аймгийн төв Чойбалсан хотод улсын төсвийн хөрөнгөөр баригдаж байгаа зарим барилгын ажлын явцтай танилцлаа.
Ерөнхийлөгчийн эхлээд танилцсан барилга бол Боловсрол, соёл шинжлэх ухааны яамны захиалгаар баригдаж байгаа аймгийн хөгжимт жүжгийн театрын барилга. Тендерийн шалгаруулалтад орон нутгийн “Чандмань тал” компани шалгарч, барилгын ажлыг эхлүүлээд одоо 40 хувийн гүйцэтгэлтэй байна. “ Бид ирэх 7-р сард энэ барилгаа ашиглалтад өгөх зорилготой ажиллаж байна. Барилгын ажил сааталгүй явж байна” хэмээн тус компанийн захирал Ж.Энхболд ярилаа. Орон нутгийн удирдлага ч тэдний гүйцэтгэж байгаа ажилд сэтгэл хангалуун байгаагаа Ерөнхийлөгчид дуулгаж байв. Чандмань тал бол ус, дэд бүтцийн чиглэлээр үйл ажиллагаа явуулдаг , жилд аймгийн төсөвд дунджаар 80 гаруй сая төгрөгийн татвар төлдөг, аймгийн урдаа барьдаг аж ахуйн нэгжүүдийн нэг юм байна. Улсын хэмжээнд хоёрхон аймгийн театр орчин үеийн шаардлагад нийцсэн шинэ барилгатай болж байгаагийн нэг нь Дорнод аймаг гэж Боловсрол соёл шинжлэх ухааны яамны төрийн нарийн бичгийн дарга Б.Мишигжав хэлж байв.
Улсын төсвийн хөрөнгөөр гүйцэтгэж байгаа өөр нэгэн барилгын гүйцэтгэлийн хувьд шүүмжлэх зүйл олон байлаа. Энэ бол 640 хүүхдийн суудалтай сургуулийн барилга юм. “Авзага трейд” компани уг барилгыг барих тендерт шалгарсан ч гэрээгээр хүлээсэн үүргээ гүйцэтгэж чадахгүй байна гэж аймгийн удирдлага үзэж байна. Гэрээний дагуу бол барилгын ажил 2010 онд дуусах ёстой байжээ.Гэтэл өнөөдөр “Авзага трейд”-ынхэн дөнгөж барилгын материлаа татаж байна. “Бид хотоос барилгын материалаа татаж байгаа учраас хугацаа их шаардагдаж байна, бас зардал өндөр тусч байна” гэж барилгын инженер тайлбарлаж байгаа боловч энэ бол шалтаг гэж УИХ-ын гишүүн П.Алтангэрэл хэллээ. Аймгийн удирдлага ч “Авзага трейд” компанийг удаан, хариуцлагагүй байна гэж шүүмжилж байсан юм.
“Тендерийн хуулийг өөрчлөх шаардлагатай байна. Орон нутгийн бүтээн байгуулалтыг хотын компани гүйцэтгэхээр болж байгаа нь эзэнгүйдэх, хариуцлага алдах зэрэг сөрөг тал олон дагуулж байна” гэж тэд ярилаа.
Дараа нь Ерөнхийлөгч аймгийн шүүхийн байгууллагын үйл ажиллагаатай танилцав. Шүүхийн байгууллага ил тод нээлттэй ажиллах шаардлага тавьж байгаагийн дагуу тус шүүх гаргасан бүх шийдвэрээ цахим хуудсандаа байрлуулж, иргэдийг мэдээллээр хангах ажлыг хийж эхэлсэн тухайгаа Ерөнхийлөгчид танилцуллаа.
Шүүхийн шийдвэрийг олон нийтэд ил тод байлгана гэдэг бол хяналттай, хариуцлагатай болох эхлэх тавигдаж байна гэсэн үг болохыг Ерөнхийлөгч хэлж шүүхийн үйл ажиллагааг хэрхэн сайжруулах талаар шүүгчидтэй ярилцаж санал бодлоо солилцлоо.
Тендерийн хуулийг өөрчлөх хэрэгтэйг бодит байдал харуулж байна
