Монгол Улсын Ерөнхийлөгч Ц.Элбэгдорж Дорнод аймагт ажиллах үеэрээ Чойбалсан хотод улсын төсвийн хөрөнгөөр баригдаж байгаа зарим барилгын ажлын явцтай танилцлаа.
Ерөнхийлөгч эхлээд Боловсрол, соёл шинжлэх ухааны яамны захиалгаар баригдаж байгаа аймгийн хөгжимт жүжгийн театрын барилгатай танилцлаа. Тендерийн шалгаруулалтад орон нутгийн “Чандмань тал” компани шалгарч, барилгын ажил одоо 40 хувийн гүйцэтгэлтэй байна. “ Бид долдугаар сард барилгаа ашиглалтад өгөх зорилготой ажиллаж байна. Барилгын ажил саатаагүй” хэмээн тус компанийн захирал Ж.Энхболд ярив. Орон нутгийн удирдлага ч тэдний гүйцэтгэж буй ажилд сэтгэл хангалуун байгаагаа Ерөнхийлөгчид дуулгав. “Чандмань тал” бол ус, дэд бүтцийн чиглэлээр үйл ажиллагаа явуулдаг , жилд аймгийн төсөвд дунджаар 80 гаруй сая төгрөгийн татвар төлдөг, аймгийн урдаа барьдаг аж ахуйн нэгжийн нэг юм байна. Улсын хэмжээнд хоёрхон аймгийн театр орчин үеийн шаардлагад нийцсэн шинэ барилгатай болж буйн нэг нь энэ гэж Боловсрол, соёл, шинжлэх ухааны яамны төрийн нарийн бичгийн дарга Б.Мишигжав ярьж байв.
Улсын төсвийн хөрөнгөөр барьж буй өөр нэгэн барилгын ажлын явцад шүүмжлэх зүйл их байв. Энэ бол 640 хүүхдийн суудалтай сургуулийн барилга юм. “Авзага трейд” компани уг барилгыг барих тендерт шалгарсан ч гэрээгээр хүлээсэн үүргээ гүйцэтгэж чадсангүй гэж аймгийн удирдлага үзэж байна. Гэрээний дагуу бол барилгын ажил 2010 онд дуусах ёстой байжээ.Гэтэл өнөөдөр энэ компани дөнгөж барилгын материалаа татаж байгаа аж. “Бид хотоос барилгын материалаа татаж буй тул хугацаа их шаардаж, бас зардал өндөр тусч байна” гэж барилгын инженер тайлбарладаг ч энэ бол шалтаг гэж УИХ-ын гишүүн П.Алтангэрэл хэллээ. Аймгийн удирдлага ч “Авзага трейд” компанийг удаан, хариуцлагагүй байна гэж шүүмжилж байсан юм.
“Тендерийн хуулийг өөрчлөх шаардлагатай байна. Орон нутгийн бүтээн байгуулалтыг хотын компани гүйцэтгэхээр болж байгаа нь эзэнгүйдэх, хариуцлага алдах зэрэг сөрөг талтай” гэж тэд ярилаа.
Дараа нь Ерөнхийлөгч аймгийн шүүхийн байгууллагын үйл ажиллагаатай танилцав. Шүүхийн байгууллага ил тод нээлттэй ажиллах шаардлага тавьж байгаагийн дагуу гаргасан бүх шийдвэрээ цахим хуудсандаа байрлуулж, иргэдийг мэдээллээр хангах ажлыг хийж эхэлсэн тухайгаа Ерөнхийлөгчид Шүүхийн шийдвэрийг олон нийтэд ил тод байлгана гэдэг бол хяналттай, хариуцлагатай болох эхлэл тавигдаж байна гэсэн үг хэмээн Ерөнхийлөгч хэлээд шүүхийн үйл ажиллагааг хэрхэн сайжруулах талаар шүүгчидтэй ярилцаж санал солилцов.
