Ерөнхийлөгч ард түмнээ сонсч байнa
Монгол Улсын Ерөнхийлөгч Ц.Элбэгдорж очсон газар бүртээ иргэдтэй уулзалт хийж, Ерөнхийлөгчийн зүгээс хийж хэрэгжүүлж байгаа бодлого, үйл ажиллагаагаа танилцуулж, тэдний асуултад дэлгэрэнгүй хариулж байв.
Иргэдийн зүгээс Эх орны хишиг, эрдэнийн хувийг зөв, үр дүнтэй, үлдэцтэй зүйлд зарцуулах, үндсэн хуулийн зарим заалт, эрүүгийн хууль, тендерийн хууль, төрийн албаны хууль, ашигт малтмалын хуульд өөрчлөлт оруулах, оюутны тэтгэлгийн хуулийг цаг алдалгүй батлуулж өгөхийг хүсч байлаа.
Ерөнхийлөгчийн хэрэгжүүлж байгаа бодлого, үйл ажиллагаа, санаачилгуудыг дэмжиж байгаагаа олон хүн илэрхийлсэн. Ялангуяа архинаас татгалзахыг уриалсан Ерөнхийлөгчийн санаачилгыг хувь хүн, өрх гэр, хамт олон, сум , аймгаараа дэмжиж архигүй хамт олон болох хөдөлгөөн өрнүүлж буй тухайгаа ярьж байсан. Тухайлбал Баруун-Урт суманд болсон уулзалтын үеэр хэсэг иргэд, архигүй Монгол болох Ерөнхийлөгчийн уриалгыг дэмжиж “архигүй Баруун-Урт хот” болох уриалга гаргаснаа уншиж танилцуулж, энэ хүрээнд ямар ажил хийхээр төлөвлөж байгаагаа хэллээ. Архидалтын эсрэг тэмцэхэд Ерөнхийлөгч өөрөө үлгэр дууриал үзүүсэн нь эхчүүд, эмэгтэйчүүдийн сэтгэлд ихэд нийцсэн бололтой. Тэд Ерөнхийлөгчийг өрх гэрийн тэргүүнүүдэд зөв үлгэр дууриал үзүүллээ гэж хэлж байв.
“ Архи бол идээний дээж биш гэж би боддог. Эхээс төрөөд сүү амлаж хүн болдог. Тиймээс монголчууд сүүгээ идээний дээж гэж хүндлэх учиртай. Архийг идээний дээж хэмээн буруу хэлж, сурталчилдгаа болих хэрэгтэй. Архи хэрэглэгч хүмүүсийн нас залуужиж, монгол хүний удмын санд ноцтой аюул учирч байна. Цаашдаа хуулийг чангаруулж, архины үйлдвэрүүдийн тоог цөөлөх ёстой гэсэн байр суурьтай байна. Төсвийн мөнгөөр архи худалдаж авдгаа өнөөдрөөс эхлэн танай удирдлага зогсоох, та бүхэн шаардлагаа тавих ёстой шүү. Ер нь архи уухыг дэврээж, бусдыг архиар шахсанаас болж гэмт хэрэг гарсан бол шахсан хүнийг буруутан гэж үзэх хэрэгтэй” гэж Ерөнхийлөгч ярилаа.
Хөдөө орон нутгийнхан оюутны тэтгэлгийн хуулийг хурдан батлагдаасай гэж хүлээж байна. Оюутны гар дээр цалин олгох нь айл өрхийн эдийн засагт дэмжлэг болоод зогсохгүй оюутныг сонголттой, хариуцлагатай байлгах гол хүчин зүйл гэдэгтэй хөдөөгийн иргэд санал нэг байна.
Түүнчлэн үндэсний аюулгүй байдалд цогцоор нь анхаарч, үзэл баримтлалыг нь шинэчлэн баталсныг цаг үеэ олсон чухал шийдвэр гэж үзэж байна.
Олон иргэн Эрүүгийн хуулинд өөрлөлт оруулах талаар саналаа хэлж, шүүхийг ард иргэд албан тушаалтанд ялгавартай үйлчилдэг гэж шүүмжилж байлаа. Дорнод аймгийн иргэн Уранчимэг эмч нарын эсрэг гаргасан гомдолтой хэргий нь шүүх шийдэлгүй 3 жил явж байгаа тухай ярив. Баруун-Урт суманд болсон уулзалтын үеэр хүмүүс уул уурхайн зарим компанид монгол хүн гадаадын иргэдтэй яг адилхан ажлын байран дээр байгаа ч ялгаатай цалин авч буйг шүүмжлэв. Хүний эрхийг зөрчдөг, адил тэгш үйлчилдэггүй энэ мэт шүүмжлэлтэй асуудлуудыг цэг болгох хэрэгтэй гэж Ерөнхийлөгч хэллээ. Зам, дэд бүтэц, нийгмийн халамжийн бодлого, хөдөө аж ахуйн чиглэлийн асуултуудад Ерөнхийлөгчийг дагалдан яваа сайд, УИХ-ын гишүүд, агентлагийн дарга нар тодорхой хариулт өгч байв.
Ерөнхийлөгч ард түмнээ сонсч байнa
