Дорнодын Техник мэргэжлийн сургуульд газрын тосны тоног төхөөрөмж өгөхөөр боллоо
Дорнод аймгийн хувьд газрын тос, уран олборлон эдийн засгийн эргэлтэд оруулснаар орон нутгаа хөгжүүлэх, нутгийн иргэд хувь хүртэх сайхан боломжтой.
Өдгөө Дорнод аймагт “Петрочайна Дачин Тамсаг” компани ажиллаж, газрын тос олборлож байна. Энд 2000 орчим гадныхан ажилладаг. Энэ жилээс монгол ажилчдынхаа тоог 700-д хүргэх юм байна.
Нэгэнт Дорнод аймагт газрын тос олборлож эхэлсэн тул энэ орон нутгаас салбарын боловсон хүчин бэлдэхэд анхаарч байгаа гэж Газрын тосны газрын дарга Д.Амарсайхан хэллээ. Засгийн газрын болон газрын тосны салбарт үйл ажиллагаа явуулдаг компаниудын зардлаар уул уурхай, газрын тосны мэргэжлээр Дорнод аймгаас 13 оюутан суралцаж байгаа аж. БНХАУ-д газрын тосны чиглэлээр суралцаж байгаа Дорнод аймгийн 4 залуугийн 2 нь өнгөрсөн жил Бээжингийн их сургуулийн шилдэг оюутан болжээ.
Дорнод аймагт шаталсан сургалттай мэргэжлийн сургалт үйлдвэрлэлийн төв байдаг. Энэ сургуульд газрын тосны чиглэлтэй техник, тоног төхөөрөмж дутагдалтай учраас мэргэжлийн ажилчдыг орон нутагтаа бэлдэж чадахгүй байгаа тухайгаа орон нутгийн болон сургуулийн удирдлага удаа дараа хүсэлт тавьж байжээ. Ерөнхийлөгчийг Дорнод аймагт ажиллах үеэр тус сургуульд 100 сая төгрөгийн техник өгөхөөр шийдвэрлэснийг Газрын тосны газрын дарга Д.Амарсайхан хэллээ.
Дорнод аймгийн иргэд Монгол Улсын Ерөнхийлөгчтэй уулзах үеэр иргэд гадаадын хөрөнгө оруулалттай уул уурхайн компаниудтай хэрхэн зохицож хамтран, харилцан ашигтай ажиллаж болох тухай саналаа хэлж, удахгүй өөрчлөх Ашигт малтмалын тухай хуулинд тусгаж өгөхийг хүсч байсан. Ялангуяа орон нутгаас боловсон хүчин бэлдэхэд тухайн компаниудаас дэмжлэг үзүүлэх тухай асуудлыг тусгайлан оруулахыг хүсэв.
Дорнодын Техник мэргэжлийн сургуульд газрын тосны тоног төхөөрөмж өгөхөөр боллоо
