Шүүхийн үйл ажиллагаа ил тод болох эхний алхмууд орон нутагт хийгдэж байна

2011 оны 03-р сарын 07-нд Бусдад түгээх

Монгол Улсын Ерөнхийлөгч очсон аймаг бүртээ шүүхийн байгууллагын үйл ажиллагаатай танилцаж байна. Зүүн аймгууд дахь томилолтын үеэр Дорнод, Сүхбаатар, Хэнтий аймгийн шүүхийн үйл ажиллагаатай танилцаж, шүүгчидтэй уулзан шүүхийн шинэчлэлийн талаар санал солилцсон. Энэ үеэр орон нутгийн шүүхийн байгууллагууд үйл ажиллагаагаа ил тод, нээлттэй, иргэдэд ойрхон болгох чиглэлээр ажиллаж буй нь харагдаж байлаа. Шүүхийн хаалгаар орж ирсэн хүнд хүндэтгэлтэй хандаж, хэрэгцээтэй мэдээллээр хангаж, эрхий нь хүндэтгэж ажиллах шаардлагыг Дээд шүүхээс тавьж байгаа, шүүгчид ч үүнийг хэрэгжүүлэх эхний алхмуудаа хийж эхэлжээ. Зүүн бүсийн хамгийн том аймаг Дорнодод аймгийн , захиргааны, сумын, сум дундын гээд 4 шүүх ажилладаг .”Шүүхийн шийдвэрийг цахим хэлбэрээр иргэдэд нээлттэй танилцуулж байгаа. Хэдийгээр орон нутагт интернэт хэрэглээ харьцангүй бага ч бид шийдвэрээ ил болгосноор нууж хаах зүйл байхгүй гэдгийг харуулсан чухал үйл явдал болсон. Өдөрт 30 орчим хандлага байна” гэж Ерөнхий шүүгч Ц.Батсүрэн ярив. Сүхбаатар аймгийн шүүх мөн л үйл ажиллагаагаа ил тод, нээлттэй болгож байгаагаа харуулав. Шүүх өөрийн байртай болж, шүүгчид тухтай тохьтой ажиллах, иргэний болон эрүүгийн хэргийг өөр өөр өрөөнд шүүх нөхцөл бүрджээ. Хэнтий аймгийн шүүх интернэтээр дамжуулан иргэдэд нээлттэй ажиллах хэлбэрийг нэвтрүүлсэн байна. Тус аймгийн шүүхийн байранд НҮБ-ын Хүүхдийн сангаас хэрэгжүүлж буй төслийн хүрээнд Хүүхдийн гэмт хэрэг хариуцах хороо ажиллаж байна. Гэмт хэрэгт сэжиглэгдэж холбогдсон, хохирсон хүүхдүүдэд хууль эрхзүйн болон сэтгэл зүйн талаас тусалж дэмжих мэргэжилтэн тусгай өрөөнд ажилладаг юм байна. “12 дугаар сараас хойш манай аймагт хүүхэд холбогдсон гэмт хэрэг гараагүй. Бид сургууль, хүүхдийн байгууллагаар дамжуулан гэмт хэргийн эсрэг мэдээлэл сурталчилгаа хийж байгаа” хэмээн тус аймгийн шүүхийнхэн танилцуулав. Орон нутгийн шүүхийн үйл ажиллагаатай Ерөнхийлөгч танилцахдаа шүүгчдийг хүний эрхийг хүндэтгэж хяналттай, хариуцлагатай , хараат бус ажиллахыг хүслээ. “Шүүгч хүн мууг нь шийтгэнэ гэдэг бол сайныг нь хамгаалж байна гэсэн үг. Шүүгчийн гаргаж байгаа шийдвэр , хууль зөрчөөгүй амьдарч байгаа бусад олон хүний эрх ашгийг хамгаалж байна гэсэн үг” гэж Ерөнхийлөгч Ц.Элбэгдорж захиж даалгаж байлаа.